[retour à un affichage normal]

Mazarinade n° C_7_42

Image de la page

Anonyme [1649], DISCOVRS VERITABLE SVR LE GOVVERNEMENT DE L’ESTAT, Où l’on void les Ruses & Trahisons desquelles le Cardinal Mazarin s’est seruy pour se rendre necessaire auprés de leurs Majestés. , françaisRéférence RIM : M0_1153. Cote locale : C_7_42.

luy aider à tenir les resnes de cét Estat, elle a eu
pourtant ce bon heur que d’vn commun consentement
ils luy cederent tous l’honneur qu’ils
y pouuoient pretendre, en suitte de quoy le Parlement
de Paris la declara seule Regente du Roy
& du Royaume ; apres que sa Majesté eut esté
receuë par les Parisiens, dans la premiere entrée
qu’elle fit faire au ieune Roy Louys XIV. le lendemain
de la mort du Roy Louys XIII. son pere,
auec toutes les demonstrations de ioye qu’il
estoit possible, tout le peuple de Paris estant allé
à deux lieuës au deuant de leurs Majestez, comme
ceux de Ierusalem allerent iadis au deuant de
nostre Seigneur, auec des cris d’allegresse & des
acclamations merueilleuses, accompagnées de
larmes, non d’aucune douleur qu’ils eussent de
la mort du feu Roy, (qui a causé des extrémes vexations
dont il auoit surchargé son Peuple, n’en
estoit pas beaucoup aymé ny regrette) mais de
larmes d’amour, de ioye & de tendresse, que leurs
cœurs les obligeoient à verser à l’arriuée & au
ioyeux aduenement de ce ieune Roy & de la
Reyne sa mere, qui leur auoit paru si sage, si benigne
& si craignant Dieu, qu’ils esperoient &
croyoient presque asseurement, que toutes choses
seroient heureusement restablies & restaurées