[retour à un affichage normal]

Accueil > recherche > Affichage d'une occurrence en contexte

Mazarinade n° B_3_22

Image de la page

Ailly-Annery, Charles d' [signé] [1652], LETTRE CIRCVLAIRE ENVOYEE à tous les Gentils-hommes de France, pour leur addresser l'Arresté fait à l’Assemblée de la Roche-guyon, les Memoires dont on a chargé nos Deputez pour presenter au Roy, & le fouorable traittement qu’ils ont receu de sa Majesté, dattée de Marine le premier Iuillet 1652. , françaisRéférence RIM : M0_1824. Cote locale : B_3_22.



Nous croyons qu’il est important que les Bailliages vnis
& ceux qui se voudront vnir s’assemblent à Dreux pour
entendre le destail de ce que nos Deputez ont negocié,
vous y remarquerez tant de bonté de la part du Roy qu’il
est impossible que nous la puissions iamais assez reconnoistre.
Nous y prendrons des resolutions qui feront voir clairement
à toute la France que nostre seul dessein est de seruir
le Roy, de garantir nostre Corps de toutes oppressions
& de procurer en general le bien de l’Estat.
Nous apprehendons que la difficulté d’entrer & de sortir
de Paris ne fasse differer l’impression des pieces que nous
vous enuoyons, & qu’ainsi vos Deputez ne puissent se
trouuer à l’Assemblée de Dreux, ce qui retarderoit les aduantages
que nous en deuons attendre, & nous obligeroit
pour vostre commodité d’indiquer vne autre Assemblée.
Vous croyrez, s’il vous plaist, que nous n’auons point
manqué de soin & que nous n’en manquerons iamais dans
toutes les choses qui regarderont vostre satisfaction & vos
interests, qui nous seront tousiours aussi chers que les nostres,
nous sommes,
MESSIEVRS,
Vos tres-humbles & tres-affectionnez
seruiteurs.
Signé de l’ordre exprées de l’Assemblée,
CHARLES D'AILLY-ANNERY.