Mazarinade n° C_2_4
Image de la page
Anonyme [1649], AMBASSADE BVRLESQVE DES FILLES DE IOYE AV CARDINAL. , françaisRéférence RIM : M0_65. Cote locale : C_2_4.
Enfin donc, Seigneur, vous voyez
Les maux, où nous auez plongez
Par vostre départ si subit,
Par cét enleuement maudit.
Mais si vous voyez le tourment,
vous sçauez le soulagement,
Ce qu’a vostre despart perdu,
Ce gaignera vous reuenu,
Au nom de ces illustres Dames,
Qui ne sont ny filles ny femmes,
Donnez-nous quelque allegement,
En faueur du contentement,
Qu’auec elles vous auez eu,
Par le bon vin qu’y auez beu,
Par de si bonnes limonades,
Par tant d’excellentes paumades,
Par la jolie calotte rouge,
Laquelle honoroit nostre bouge,
Par les discours chez nous tenus,
Par nos virginitez perdus,
Par la maistresse d’Hemery,
Laquelle est de nostre party,
Par vos gans & mains parfumez :
Enfin par tout que vous aymez ;
Soit vos jolys marionettes,
Soit vos petites niccettes,
Ayez de nous compassion,
Et nous accordez quelque don :
Ou si rien donner ne pouuez,
Ou si rien donner ne voulez ;
Du moins faite nous cette grace,
Qui sauuer a nostre disgrace :
Vous auez force bons garçons,
A S. Denys & aux enuirons,
De fort bons freres de soudrilles,
Qui manquent de joyeuses filles,
Et violent la villageoise,
Faute de la treuuer courtoise ;
Ramenez-les tous à Paris,
Ils auront passe-temps icy,
Ils en auront contentement,
Comme nous du soulagement.
Ce dit, ny luy rien accorda,
Ny toutefois rien refusa,
Mais Iule d’vn signe de teste,
Vn signe qui n’est pas tant beste,
L’aduertit qu’il consulteroit,
Ce que faire bon y pourroit :
Elle s’en va dans l’anti-chambre,
La response de Iule attendre.
Mais alors Thulie la quitte,
Sans voir le fruit de sa visite.
FIN.
Image de la page