[retour à un affichage normal]

Mazarinade n° A_5_101

Image de la page

Anonyme [1649], LE VRAY AMATEVR DE LA PAIX, CONTRE LES ADVIS dangereux du Libelle intitulé, ADVIS SALVTAIRE & genereux, &c. , françaisRéférence RIM : M0_4065. Cote locale : A_5_101.

encore adiouster icy, en verité est-ce à sa personne à
qui nous en voulons, ou bien à son gouuernement incommode ?
Ce n’est point luy precisement que nous
attaquons, autrement ce seroit vne entreprise infinie,
de laquelle nous n’aurions aucun succés, puis qu’il n’est
pas à nostre pouuoir d’empescher que la place qu’il occupe
ne soit remplie de quelqu’autre. Ie suis certain que
personne ne crie contre luy qu’à cause qu’on le croit indigne
du Ministere, & qu’on dit que c’est luy qui a causé
la ruine & la pauureté de l’Estat ; Par consequent
nous n’auons entrepris que de combattre ses violences,
& nous garentir des maux dont sa conduite nous menaçoit.
Si donc il arriue que par les raisons d’vne iudicieuse
politique on ne doiue point l’esloigner, mais
pourtant changer ses maximes, & se seruir d’vn Conseil
plus moderé, que nous importe qu’il reste parmy
nous, s’il est dans l’impuissance de nous nuire ? & dequoy
nous mettre en peine s’il iouist en France, qui est
vne terre de liberté, du bien-fait de la vie, s’il ne peut
desormais s’en seruir pour nous affliger ? Apres quoy
nous pouuons faire estat que nous auons acquis la plus
grande partie des choses que nous auions souhaitées, &
que c’est l’effet d’vne enuie tres-punissable de nous
plaindre de ceux qui se sont meslés d’vn accord si aduantageux.
Pour toy, Partisan de rebellion, si tu ne
reuiens de ton aueuglement, & si au milieu de tant d’obiets
de repos, tu demeure encore insensible, sçache
que pour tout fruict de tes desseins furieux, tu n’emporteras
que la honte d’vn temps perdu, puis que par
tes obstinations outrageuses tu fais cognoistre à tout
le monde que tu ne respire que le pillage & le massacre
de tes compatriotes, & que c’est ta passion & non point
leur vtilité qui t’oblige à les attirer en vn dueil, dont la
raison & l’interest public les viennent de retirer. En
cela tu fais la folle demande à Iupiter, grenoüille que
tu es ; Il te presente vne condition tranquille, & le trop