[retour à un affichage normal]

Mazarinade n° C_3_1

Image de la page

Anonyme [1649], LES LEÇONS DES TENEBRES DES PARISIENS, OV LES PROPHETIES de Ieremie sont nayuement expliquées suiuant ce qui arriue à present. , françaisRéférence RIM : M0_1808. Cote locale : C_3_1.

Auant-propos.
LE Prophete Ieremie preuoyant les malheurs qui deuoient tomber
sur la ville de Ierusalem, aduerty sainctement de Dieu, versa des
pleurs sur cette Cité, lesquels reduisant par escrit, il les appella Lamentations,
à cause du sujet qu’elles contenoient. Dans cet ouurage diuin,
estant inspiré de Dieu il prophetisa ce qui deuoit arriuer à ceite orgueilleuse
Cité, de sorte qu’elle pouuoit euiter ses malheurs, si elle eut eu des
yeux assez clairs pour descouurir les auertissemens que ce sainct homme
luy auoit donnez. Mais ce fut, à ce que ie pense, vn secret jugement
de Dieu, qui vouloit tirer raison de ce peuple, parce qu’il auoit fait
mourir IESVS. CHRIST son Fils. Mais que dis je, nous sommes aueugles
nous mesmes, & ne voyons pas que ce que nous prenons pour les
autres, peut estre aussi pris pour nous. Et comme les Propheties ne
sont jamais claires à ce point, qu’on les puisse expliquer aisement, il est
probable, que ces escrits peuuent estre appliquez à nostre fortune, si nous
les voulons considerer de bien pres. C’est ce que ie desire de vous faire
voir à present, vous monstrant veritablement, que Dieu en aduertissant
les Iuifs de ce qui leur deuoit arriuer, vouloit aussi nous aduertir auec
eux de ce que nous auions à craindre. Car comme vne predication n’est
pas faite pour vne seule personne, mais bien pour vn millier d’ames qui
peuuent s’y rencontrer, il n’est pas si mal à propos que ces Propheties
nenous puissent seruir aussi bien qu’aux Iuifs. Ce que tu pourras voir
aisément, cher Lecteur, si tu veux lire l’explication que i’y donne,
que i’ay suiuie le plus naiuement que i’ay pû. I’ay diuisé cét ouurage
en trois iournées suiuantes, pour ne me point esloigner de l’intention de
l’Eglise, qui chante ses Leçons en trois iours diuers que l’on appelle Tenebres,
à cause qu’en tout ce temps-la IESVS-CHRIST fut dans les accessoires
de sa Passion ; ce qui te fera voir sans doute, que les predictions
du Prophete ont tout predit ce qui s’accomplit maintenant ; car
ie ne me retire aucunement du sens de ce grand Prophete. De plus ie
t’aduertiray que ie mets premierement son texte, que ie traduis fidellement
en François, puis apres i’en donne l’explication à chaque pause,
pour euiter la confusion. Ioüis heureusement du trauail que ie te presente.
Adieu.