[retour à un affichage normal]

Mazarinade n° A_6_74

Image de la page

Anonyme [1649], LES PRESSANTES EXORTATIONS DE L’EVROPE, AVX QVATRES MONARCHIES Chrestiennes, & autres Etats de son Empire, pour la paix vniuerselle, & l’vnion de leurs armes, pour la destruction de l’Empire Ottoman. , françaisRéférence RIM : M0_2863. Cote locale : A_6_74.

de tant de Religions, & de Sextes Heretiques,
qui se trouuent dans l’estenduë de mon Empire,
ils fussent punis de leurs pechez, par ce fleau
de la guerre, & moy consequemment priuée du
fruit de mes pretentions. Quelques-vns de mes
Monarques, & particulierement le Roy de France,
se sont bien autrefois efforcez à vanger la querelle
de Dieu, par l’extirpation de l’Heresie : mais
eux & moy à nostre confusion auons tousiours reconnu,
qu’à l’exemple de l’Hidre, si l’on détruisoit
vn chef, il en renaissoit cent ; de sorte qu’il a
fallu demeurer d’accord que pour vaincre tout a
fait, & ruiner cette peste des ames, des Royaumes
& des Empires, il n’y falloit employer d’autres armes,
que le glaiue de l’Euangile.
 
De quelle affliction ne fus-je point touchée, il
y a trois ans, quand le bruit courut que le Grand
Seigneur auoit iuré par Mahomet, dans son Diuan,
qu’il ne quitteroit iamais les armes, qu’il
auoit de-jà si puissamment leuées, qu’il n’eust entierement
conquis, & toute la Chrestienté, &
toute la terre habitable, pour faire de son croissant
vn Globe tout entier ? Ie voyois tous mes
Royaumes, & mes Etats armez les vns contre les
autres, & qui n’eut eu sujet de craindre de tomber
sous la tyranie de ce Monarque Barbare ; puis que
de quelque côté que ie tournasse ; ie n’aperceuois
point de forces, ny de puissance pour luy resister ?
Dieu pour ce coup-là, detourna l’orage que ie craignois