[retour à un affichage normal]

Accueil > recherche > Affichage d'une occurrence en contexte

Mazarinade n° C_7_82

Image de la page

Anonyme [1649], EXHORTATION DE LA PVCELLE D’ORLEANS, A TOVS LES PRINCES DE LA TERRE, DE FAIRE vne Paix generale tous ensemble, pour venger la mort du Roy d’Angleterre, par vne guerre toute particuliere. , françaisRéférence RIM : M0_1329. Cote locale : C_7_82.


& voulurent liurer tels scelerats à la cruauté des bestes. Si les
Loix punissent si seuerément vn fils desnaturé, pour auoir osté
à sa mere la vie qu’il tenoit d’elle : que pensez-vous qu’elles fassent
à celuy qui a tué le pere commun de tant d’enfans ? Faut il
auoir plus de retenuë pour punir le crime d’vn particulier, que
celuy qui regarde tout le genre humain ? Quoy ! l’on reputera vn
Publius Malleolus qui n’a massacré que sa mere, vn homme priué,
indigne de ioüir de la faueur d’aucun des elements ; & l’on
laissera respirer l’air à ces diaboliques enfans, qui d’vn dessein
d’enfer ont conspiré contre la vie du pere commun de toute
vne nation ? Ils viuront apres auoir fait mourir leur pere ? Et
apres l’auoir fait mourir par la main d’vn bourreau, afin de le
rendre par vne mort criminelle, tout criminel sans crime ? Les
Roys ne doiuent rendre compte de leurs actions qu’à la Souueraine
puissance, de laquelle seule ils tirent toute leur authorité :
& ces desnaturez sans aucune authorité, ont fait mourir le
leur ? Bourreaux, n’estoit-ce pas assez d’auoir deshonoré la France
par le meurtre de Marie Stuart ? Falloit-il que pour authoriser
vostre crime, vous y adjoustassiez celuy d’auoir tué vostre
Prince ? Sans autre raison, sinon que vous estes en possession de
faire mourir vos Rois ? Mais il ne s’en faut pas estonner : car ceux
qui font la guerre à Dieu, sont capables de tous crimes. Toutefois
puis qu’ils sont tels, il est juste que toutes les creatures se
bandent contre les ennemis du Createur.
 
Armez-vous donc, ô Ciel, & vous, ô Terre, contre cette nation
impie, l’horreur, la honte, le deshonneur du reste de la terre,
qui a fait honte à toute la nature. Beau Soleil, cachez-luy vostre
face lumineuse, afin qu’elle viue en des perpetuelles tenebres :
puis qu’elle s’est renduë indigne de ioüir de la vostre. Cieux,
ne tournez plus pour les Anglois, demeurez immobiles dans
l’estat où vous estes à present, pour leur faire ressentir la rigueur
d’vn hyuer continuel, qu’ils ont merité par ce parricide execrable,
qui meriteroit vne peine eternelle. Feu, air, eau, terre,
attaquez les de toutes parts. Descendez de vostre Sphere, ô
feu elementaire, & reduisez en cendre cette nation ennemie
de l’Vniuers, aussi bien qu’elle en est la honte. Que l’air ne
leur serue que pour leur apporter vn venin contagieux, & l’eau