[retour à un affichage normal]

Mazarinade n° B_14_45

Image de la page

Anonyme [1652], LES VERITABLES MOTIFS DE LA RETRAITE DE MONSIEVR LE COMTE D’HARCOVRT, ET LES IVSTES RAISONS qui l’ont obligé de quitter le Commandement de l’Armée Mazarine. , françaisRéférence RIM : M0_3970. Cote locale : B_14_45.

Mais tout cecy n’estoit que des preludes de la ruse du
Cardinal & de la piece qu’il luy vouloit joüer, il auoit
concerté en luy mesme de ne le pas long-temps laisser
en la charge de General d’armée qu’il occupoit auant de
luy faire toutes ces grimaces qui estoient autant de dispositions
à ce qu’il pretendoit, il ne luy faisoit donc tout
cecy que pour l’obliger luy mesme à s’en deffaire par
ressentiment & déplaisir, ou bien s’il ne le faisoit à trouuer
matiere pour luy oster par violence & pour le maltraiter
au dernier poinct, ainsi qu’il fait tous ceux qui
l’ont trop obligé.
Il a assez bien reüssi dans toute cette intrigue, car
outre le rebut ou se trouuoit le Comte d’Harcour, le
dépit qu’il en auoit, la relasche qu’il faisoit paroistre au
fait de la Guerre, il est arriué qu’il a perdu deux Regimens
entiers par les surprises de Marcin & de Baltazar
qui ne s’endormoient pas auprés de luy. Cette perte
dont le Cardinal a esté rauy luy fit prendre occasion de
faire décrier sa conduitte & sa fidelité auprés de la
Reyne, de témoigner luy mesme du rafroidissement à
l’endroit de ce General, de preferer les actions des
autres Chefs aux siennes, & enfin de le mettre mal dans
l’esprit de la Reyne dont il abuse par ses artifices. Iusque-lâ
qu’il a obligé cette bonne Princesse à faire des
liberalités aux autres, sans considerer celuy qui en meritoit
bien quelqu’vne ; Il a fait donner vne rose de diamants
à Monsieur de Turennes, qui vaut bien trois cent
mille franc, luy mesme a fait liberalité au Mareschal
d’Hocquin cour de deux seruices de vaisselle d’argent,
& à Broglio en faueur de qui toute cette intrigue se
mene des quatre plus beaux cheuaux de son Escurie,
outre qu’il luy a procuré particulierement les bonnes
graces du Roy qui luy donne toute sa confidence.
Dans cette prodigieuse faueur Broglio porte son ambition
aux plus hautes charges, & aux plus glorieux
emplois de la Cour qui passent par les mains de son