[retour à un affichage normal]

Accueil > recherche > Affichage d'une occurrence en contexte

Mazarinade n° A_1_60

Image de la page

Anonyme [1649], EXTRAICTS DES REGISTRES DE PARLEMENT, contenans la Harangue faite au Roy & à la Reyne Regente par Monsieur Talon, Aduocat General, Auec son rapport audit Parlement, de la response de leurs Majestez. Ensemble la Lettre de l’Archiduc Leopold, Les Propositions de l’Enuoyé de sa part, & Arrestez sur ce sujet de ladite Cour. Du 19. Febuier 1649. , françaisRéférence RIM : M0_1356. Cote locale : A_1_60.


imputé à la posterité d’auoir entrepris quelque chose au delà de l’exercice &
de la fonction legitime de leurs charges. Au contraire ils nous ont donné charge
d’auoir l’honneur de voir vostre Majesté sans autre equipage, que celuy de
nos Robbes, les caracteres exterieurs de la Magistrature, que vostre Majesté
nous a communiquez auec lesquels nous esperons fléchir son courroux & son
indignation, appeller de sa puissance à sa bonté, & luy demander la Iustice
qu’elle ne refuse à personne. Ainsi l’Escriture nous enseigne que la Majesté diuine
estant offensée contre son peuple, & le voulant chastier, le premier des
Pontifes se faisant mediateur entre Dieu & les hommes, ne se seruit d’autres
armes que de la priere qu’il auoit sur les lévres, & de l’encensoir qu’il tenoit
à sa main. Il auoit pour toute sorte de deffenses les habits de sa Profession,
auec lesquels il s’opposa à la colere du Ciel, & resista à la violence & à la necessiré
qu’il deuoit apprehender, ce qui rendit son intercession efficace & glorieuse.
Quant à nous, Madame, nous abordons vostre Majesté l’amertume dedans
l’a me & l’humilité dans le cœur pour la supplier d’auoir agreable les excuses
de son Parlement, qui a differé d’entendre son Herault, de crainte d’offencer
la Royauté, & de faire preiudice au point de la Souueraineté, de la conseruation
duquel ils sont jaloux plus que tous les hommes du monde. Et au
surplus ils nous ont charge de protester à vostre Majesté, l’obeïssance, les respects,
& la soumission toute entiere du Parlement. Apres quoy la Reyne ayant
commandé à Monsieur le Chancelier qu’il nous fist entendre sa volonté, il
nous dit que sa Majesté auoit satisfaction entiere des paroles & des asseurances
que nous luy auions données, mais qu’elle ne pouuoit en estre absolument
contente, si elles n’estoient suiuies & accompagnées d’effets veritables, aprés
lesquelles nous pourrions esperer les tesmoignages de sa bien-veillance toute
entiere, & dans la conseruation de l’authorite Royale, l’asseurance de tous les
particuliers. Qu’encore qu’elle ne peust connoistre les Arrests du Parlement
pour des deliberations d’vne Compagnie Souueraine, attendu l’Estat present
des affaires, qu’elle ne changeoit pas neantmoins de volonté, & que nous esprouuerions
tousiours les effets de sa bien-veillance, quand nous nous mettrions
en nostre deuoir, & qu’elle dõnoit ces premieres asseurances par la seureté
qu’elle promettoit des personnes & des fortunes de tous les particuliers,
sans en excepter vn seul. Apres quoy M le Duc d’Orleans prenant la parole,
nous dit qu’il s’estonnoit fort que le Parlem?t ne rendist pas promptement ses
obeïssances à la Reyne, veu qu’il y estoit obligé en toute sorte de façons, & qu’il
en auoit tousiours donné les exemples, pouuant au surplus se promettre de la
bien-veillance de la Reyne toute sorte de bons traittemens, & pour le general
de la Compagnie, & pour tous les particuliers. En suite Monsieur le Prince
nous dit qu’il n’auoit rien à nous ad ouster à ce qui nous auoit esté representé
de la part de la Reyne, & de Monsieur le Duc d’Orleans : Que nous pouuions
asseurer le Parlement que la Reyne n’auoit autre intention que le bien de l’Estat
& la conseruation de l’authorité Royale, dans laquelle est contenu le salut
du peuple, & la fortune de tous les particuliers. Ainsi nous estant retirez,
nous auons esté obligez de coucher à Saint Germain, & d’en partir le lendemain
apres auoir esté visitez de plusieurs personnes de grande condition, qui
tesmoignerent auoir grande satisfaction de ce commencement de negociation.