[retour à un affichage normal]

Accueil > recherche > Affichage d'une occurrence en contexte

Mazarinade n° A_6_13

Image de la page

Anonyme [1649], MANIFESTE POVR MR LE DVC DE BOVILLON, ET MESSIEVRS LES autres Generaux. Contre les Libelles que le Cardinal Mazarin a fait publier contre eux. Auec la Declaration qu’a faite Mr le Marquis de Noirmonstier, touchant les troupes de l’Archiduc Leopold qu’il conduit en France. , françaisRéférence RIM : M0_2402. Cote locale : A_6_13.


ceux qu’il a fait semer il y a quelques temps contre Monseigneur
le Prince de Conty, de Beaufort, d’Elbeuf, & tous nos Generaux,
dont l’ineptie, & la fausseté pour estre trop manifeste n’a
besoin d’estre refutée. Quand à ceux qu’il fait voir aujourd’huy,
ils ne s’adressent qu’à Monsieur de Boüillon seulement, ce
pernicieux esprit esperant que les pretentions particulieres que
peut auoir ce braue Duc, seruiront d’approbation à leur calomnie.
Et que ne s’attaquans qu’à vn seul, ils pourront plus faire que
ceux qui choquoient tous nos Generaux ensemble. Entre autres
faussetez qu’il luy impose, il l’accuse de trahison, pour auoir esté
celuy qui a fait condescendre Messieurs les Princes & Generaux
à accepter les offres de l’Archiduc Leopold ; que lesdites offres
n’ont esté faites qu’en consequence de l’intelligence secrette
qu’il auoit auec l’Espagne & ledit Archiduc, & de la promesse
qu’il auoit que les troupes ennemies n’entreroient en France que
pour executer le traitté qu’il auoit fait auec l’Espagnol, par lequel
traitté ledit Archiduc le deuoit restablir à Sedan moyennant
certaine recompense. Voila ce que portent ces libelles, que
l’on peut facilement refuter. Premierement parce qu’il est certain
que Monsieur le Duc de Boüillon n’ayant esté aucunement
informé du dessein qu’auoit le Cardinal Mazarin d’enleuer le
Roy, & d’assieger Paris auant la Feste des Rois, il ne peut auoir
fait ce traitté pretendu auec l’Espagne, qu’ils veulent toutefois
estre du mois de Decembre dernier. Car de dire qu’il pourroit
auoir conclu ledit traitté, quoy qu’il n’ait point preueu les troubles
presens : C’est ce qui paroist hors de raison, puis que les troupes
Espagnoles luy deuoient estre données pour l’execution de
son dessein : Ce que l’Espagne n’eust iamais fait si la France eust
esté en paix, n’ayant cy-deuant pû garder ses frontieres, loin de
faire aucune entreprise en faueur d’vn Estranger.
 
Secondement estant certain que l’Archiduc Leopold ne nous
a fait offre de ses troupes qu’apres auoir esté sollicité par le Cardinal
Mazarin de les luy amener pour la ruine de Paris : Il faut necessairement
conclure, que ledit Archiduc n’a autre dessein de
sa marche que de faire vne Paix stable & de durée, & non pas
de restablir Monsieur de Boüillon à Sedan. Car quand ce Prince
donneroit à l’Espagne ladite ville de Sedan (qui est le plus