[retour à un affichage normal]

Mazarinade n° B_19_17

Image de la page

Anonyme [1652], HARANGVE DE LA VILLE DE PARIS A MONSIEVR DE BROVSSEL, CONSEILLER DV ROY, Sous-Doyen de la grand’Chambre, & Preuost des Marchands de Paris. , françaisRéférence RIM : M0_1548. Cote locale : B_19_17.

HARANGVE DE LA VILLE
de Paris à Monsieur de Broussel Conseiller du
Roy, Sous-Doyen de la Grand’Chambre, &
Preuost des Marchands de Paris.
MONSIEVR.
C’est auiourd’huy qu’il faut que les plus meschans
& les plus enuieux confessent que Dieu vous
a reserué pour le salut de la France, & qu’il veut
que vous rendiez la vie & la liberté à ce grand peuple qui vous
l’a conseruée, & qui s’est armé si amoureusement pour vous rirer
des mains du Tyran qui les oppresse. Il falloit vne vertu
comme la vostre pour s’opposer aux crimes & à la rage de l’estranger
qui a iuré nostre ruine, à cause que nous ne pouuons
souffrir celle de tout l’Estat, & que nous sommes resolus de defendre
la Capitale & le Chef pour maintenir toutes les parties.
Les idolatres du Cardinal Mazarin sont assez traistres à leur patrie
& assez esclaues de l’insolence de sa fortune pour nous accuser
de rebellion ; Mais les amateurs de la Royauté, & les fideles
subjets du Roy approuueront tousiours nostre zele, &
loüeront eternellemnt la grandeur de nostre constance, & la
iustice de nos resolutions.
Nostre Roy qui est captif entre les mains des proscripts &
des ennemis de son Estat, ne pouuant plus agir de luy-mesme,
ny par les mouuemens qui le font pere de son peuple, & protecteur
de ses subjets ; a besoin que les libres qui conseruent son
throsne, & qui gardent le lit de sa iustice, empeschent que ceux
qui abusent de son nom & de sa personne, ne s’emparent encore
de son pouuoir & de son authorité.