[retour à un affichage normal]

Mazarinade n° B_1_18

Image de la page

Anonyme [1649], RELATION DE CE QVI S’EST PASSÉ A PARIS, Depuis l'enleuement du Roy Jusques à present. Enuoyée aux Prouinces. , françaisRéférence RIM : M0_3117. Cote locale : B_1_18.

les supplier tres-humblement de vouloir nommer les coupables du
crime porté par ces lettres pour en faire vne punition exemplaire. L’on
refusa de les entendre, on ne les voulust ny voir ny receuoir, ils demeurerent
toute la nuict sur le paué, & ils reuinrent auec cette noucelle,
que la Ville estoit bloquée : Ensuite dequoy fut apporté sur le
Bureau vn Arrest du Conseil, portant defenses à peine de la vie d’amener
des viures en cette Ville.
 
La guerre estant declarée d’vne façon si extraordinaire, il fut aise
de voir que le Cardinal Mazarin pour establir sa tyrannie, & disposer
plus absolument du Royaume, auoit resolu la perte du Parlement
& de la Ville de Paris, qui ne peut arriuer sans la subuersion entiere de
cét Estat. De sorte que le Parlement se creust obligé d’aller à la source
d’vn mal si pressant, & d’en couper promptement la racine. Ce qui
donna sujet à l’Arrest contre le Cardinal Mazarin, que nous vous enuoyons,
& à celuy qui ordonne la leuée d’vn nombre suffisant de gens
de guerre pour la defense de la Ville, & pour la seureté des conuois
de viures.
Ce second Arrest a esté heureusement executé par la genereuse vnion
qui s’est trouuée esgale dans tous les ordres de cette Ville, & les contributions
y ont esté volontaires, L’on a leué en peu de jours plus de
douze à treize mil hommes de pied, & quatre à cinq mil cheuaux, tous
gens d’eslire & d’experience dans les armes. Les ordres pour la Police
& les viures, pour les Finances, pour les passeports, & depuis peu de
iours pour les despesches, estant si bien reglés par autant de Chambres
composées de Deputez de toutes les Compagnies Souueraines, outre
les conseils de guerre. Le Parlement demeurant perpetuellement assemblé :
Il n’y a personne qui ne iuge que dans vne telle conduite, vne
cause si juste & des intentions si sinceres, ne soient assistées des benedictions
du Ciel.
Il nous vient tous les jours des viures abondamment, & les marchés
sont tellement remplis, qu’il n’arriue aucun desordre ni tumulte ;
de sorte qu’il n’a pas este besoin de faire sortir les bouches inutileni
de fermer les portes à ceux qui y viennent tous les iours en grand
nombre.
Monsieur le Duc d’Elbeuf fut le premier qui s’offrist pour la defense
d’vne si juste cause. Et le iour mesme Monsieur le Prince de Conty
se retira de Saint Germain auec Monsieur le Duc de Longueville, le
Prince de Marsillac & le Marquis de Noirmonstier, pour asseurer le
Parlement & la Ville de leur passion pour le bien public, & du ressentiment
qu’ils auoient des conspirations du Cardinal Mazarin. Ils entrerent
le lendemain au Parlement, & Monsieur le Duc de Boüillon
s’y treuua auec Monsieur le Mareschal de la Motthe Houdancourt.