[retour à un affichage normal]

Accueil > recherche > Affichage d'une occurrence en contexte

Mazarinade n° A_8_74

Image de la page

Anonyme [1649], RELATION DE CE QVI S’EST PASSÉ A PARIS, Depuis l’enleuement du Roy jusques à present. Enuoyée aux Prouinces. , françaisRéférence RIM : M0_3117. Cote locale : A_8_74.


de Camp & de Seigneurs de marque, qui se sont declarés pour le
mesme party ; nous les nommerons confusément.
 
Et premierement le Prince de Martsillac Gouuerneur de Poictou,
Lieutenant General ; le Marquis de Noirmonstier aussi Lieutenant
General, qui a fort dignement serui sa Majesté en plusieurs campagnes,
le Comte de Maure aussi Lieutenant General ; le Marquis de
Vitry Gouuerneur de Meaux ; le Marquis de Fosseuse ; le Marquis de
la Boulaye ; le Marquis de Duras & son frere ; le Comte de Fiesque ; le
Marquis d’Alüye ; le Comte de Matha ; le sieur de Laigue ; le Marquis
de Beuuron, & Messieurs de Seuigny.
Ce sont toutes personnes illustres en dignités, en seruices, & qui
ont auec eux quantité de Gentils-hommes & gens de Commandement.
Il y a encore beaucoup d’autres Seigneurs qui se declareront dans les
Prouinces, comme ont fait Monsieur le Duc de Rets à Belle-Isle dans
la Bretagne, le Comte de Carces en Prouence, & en Normandie le
Comte de Matignon Lieutenant du Roy, le Comte de Flex, & presque
generallement toute la Noblesse.
Quelques Parlemens ont desia pris la part qu’ils deuoient en cette
affaire. Celuy d’Aix a commencé le premier, & toute la Prouence s’estant
mise en armes pour resister à la violence que luy preparoit par
l’ordre du Cardinal Mazarin le Comte d’Allais son Gouuerneur, elle
s’est saisie de sa personne & de celle du Duc de Richelieu, & ont arresté
les Galeres au port de Marseille. Les Deputez de ce Parlement estant
venus en cette Compagnie, y ont representé les iniustices, & les outrages
faits à leur Compagnie, & les exactions commises dans la Prouince :
Et ont demandé la jonction, tant pour la suppression du nouueau
Semestre, que pour noüer vne parfaite correspondance dans tout
le cours de cette affaire. Ce qui leur a esté accordé, & ont esté donnez
les Arrests que nous vous enuoyons.
Celuy de Roüen a semblablement tesmoigné par vn Conseiller deputé
de sa part, qu’il se sentoit obligé de joindre l’authorité qu’il a
dans la Normandie à celle de Monsieur le Duc de Longueville, pour
nous assister en vne affaire de si haute consequence, pour le seruice du
Roy & conseruation de son Estat. Le Deputé nous a apporté trois Arrests,
l’vn pour la Ionction, l’autre pour la saisie des deniers publics,
& le dernier pour la cassation du Semestre iniustement estably dans
le mesme Parlement. L’on a donné pareil Arrest que pour celuy d’Aix,
auec cette clause pour tous les deux Parlemens, qu’il ne se fera rien
à l’aduenir qui puisse blesser l’authorité du Roy, le bien de l’Estat &
les interests de leurs Compagnies ; ce qui attraict tous les autres Parlemens.
Ce qui fait bien voir que s’agissant de la conseruation de l’Estat,
ils ne veulent auoir qu’vn mesme esprit & vne mesme conduite pour
en empescher la ruïne.