[retour à un affichage normal]

Mazarinade n° B_16_23

Image de la page

Anonyme [1652], HARANGVE FAITE A LA REYNE, PAR VN REVEREND PERE CHARTREVX, POVR LA PAIX. , françaisRéférence RIM : M0_1565. Cote locale : B_16_23.

ils seront malicieux ; si vous estes fortes, ils seront
forts, si vous estes chaste, ils seront chastes, si vous
leurs commandez, ils vous obeyront, pourueu que
vous vous rendiez douce en leur endroit. Que desirez-vous
dauantage d’vn peuple qui est, qui sera, & qui fut
tousiours franc. Ne voyez vous pas que ce que ie vous
ay anoncé cy-deuant est arriué, Quel aduantage auez
vous tiré de Sainct Cloud ? quels profits de sainct Denis ?
Ie ne vois point que ses dégats ayt mis vostre France
plus à son ayse. Ie vous prie dites moy lequel à plus
perdu de vous, ou de vos suiets, (quoy qu’ils ayent esté,
ainsi qu’à Charenton trahis.) C’est que les vostres qui
sont les nostres, & les nostre qui sont les vostres, sont
demeuré sur les place. Sont des effets de la guerre,
dites vous, mais songez que ce diuorce ne peut tomber
que sur vos espaules. He ! Madame, que l’on vous
appelle plustost gubernatrice, & consolatrice, que desolatrice
& minatrice de la France. De qui serez vous
Reyne quand il n’y aura aucun qui vous veulent reclamer
par ce tiltre eminent ? La femme sage edifie la
maison ; & il semble que vous la vouliez destruire ?
Quoy ? vn éstranger est-il capable de subuertir vos semtimens ?
Est-il né en mesme air & Climat que vous ?
N’estes-vous pas la Reyne des François, & luy n’est il
pas la ruyne de sa patrie ? Quoy ? permettez vous qu’vn
desolateur de Villes, de Prouinces & de Royaumes ?