[retour à un affichage normal]

Mazarinade n° A_8_33

Image de la page

Anonyme [1649], REMARQVES IMPORTANTES A LA CAVSE COMMVNE, SVR LES ACTIONS ET LA conduite de Monsieur le Duc d’Elbeuf, dans les Affaires de ce temps. , françaisRéférence RIM : M0_3267. Cote locale : A_8_33.

main ; Monsieur le Marquis de Clanleu qui en estoit
Gouuerneur, & Monsieur le Marquis de Cugnac,
Mareschal de Camp. Le premier, apres y auoir fait
tout ce qu’on dit des Alexandres & des Cesars, y est
mort au milieu des ennemis qu’il auoit abattus de sa
main ; & le second qui gardoit le plus foible poste de
la Place, apres auoir repris iusques à cinq fois sa premiere
barricade, & tué cinquante des ennemis qui
l’auoient attaquée, au moment qu’il pensoit que
dans tous les autres quartiers on eust fait la mesme
resistance & la mesme execution, veid venir les ennemis,
lesquels s’estãs preualus de la lascheté de la pluspart
des Officiers qui auoient abandonné leurs postes
& leurs soldats, I’attaquerent par derriere & le
contraignirent de se retirer du costé de la riuiere, où
n’ayant plus trouué les Soldats qu’il y auoit posez, il
se ietta dans vn batteau, dans lequel il perdit encores
vn Sergent & vn Soldat, & fut emporté dans le courant
de l’eau par les glaçons, qui luy sauuerent la vie
qu’il venoit d’exposer auec tant de generosité.
 
Cela ne satisfait pas les ignorãs du mestier de la guerre,
on vouloit qu’il allast secourir cette Place. C’est veritablement
en cét endroit où le plus moderé de tous
les hommes seroit à bout de sa patience. On veut que
l’on secoure vne Place prise d’emblée, éloignée d’vne
grande lieuë, & couuerte d’vne puissante armée. Mais
au moins, disent-ils, il falloit passer sur le ventre des
ennemis qui paroissoiẽt, & y mener toute cette bourgeoisie
affectionnée. Il falloit donc épandre le sang
du Citoyen pour secourir vne Place perduë, & qui ne
pouuoit estre gardée que par nous, comme l’euenement