[retour à un affichage normal]

Accueil > recherche > Affichage d'une occurrence en contexte

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.


repousser comme vn outrage, ce que des personnes si
eminentes taschent à se conseruer comme vn priuilege.
Quand leur orgueil ne passeroit pas plus auant, on ne
pourroit sans impieté en rendre la Religion Chrestienne
coupable, ce seroit infecter la source de la veritable modestie,
que d’en faire descendre vne ambition si mondaine ;
ce seroit outrager cette glorieuse mere, que de
luy supposer vn enfant si indigne d’elle, & qui ne porte
aucun de ses traits. Mais, SIRE, c’est auec vn extrême
regret que ie suis forcé à vous dire que l’ambition
des Euesques se porte bien plus auant, ils ne se seruent
de cét attentat que comme d’vn degré à vn plus enorme,
ils ne veulent pas dépoüiller le Parlement de l’authorité
que vous luy auez donnée, pour vous la rendre, mais
plûtost pour vous la rauir, & pour la garder eux-mesmes,
leur intention n’est pas de deuenir plus sousmis à
vostre Majesté, mais de luy deuenir égaux, ils ne s’efforcent
de s’éleuer au dessus de vos Parlements, & de s’approcher
par là, de vostre grandeur, que pour trouuer
plus de facilité à la cõbattre, pour la faire descendre iusques
à eux, ou pour s’éleuer iusques à elle. En vn mot,
SIRE, vous l’auez appris par les propres paroles de celuy
qui vous a fait vne harangue si pleine de colere contre
le Parlement de Tolose, & nous ne nous seruons pas
en cette rencontre des coniectures de nos esprits, mais
des confessions de leurs bouches ; Ils ne vous reçoiuent
pas pour leur Iuge, ils ne veulent dépendre que d’vne
puissance estrangere, ils veulent porter leurs causes criminelles
de là les monts. Mais quoy, SIRE, perdrez
vous autant de subjets que vous nommerez d’Euesques ?
Dés qu’ils seront Euesques, cesseront-ils d’estre François ?
Viuront-ils au milieu de vostre Royaume sans y
viure sous l’obeïssance de vos Loix, ou s’ils s’y sousmettent
à la puissance de vos Loix, ne seront-ils pas soûmis
aux Magistrats ? [Illisible] des chastimens de