[retour à un affichage normal]

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.

de ma voix ne trahit point la sincerité de mes intentions,
& le zele que i’apporte à la defence d’vne cause si iuste,
ie ne doute pas que vostre Maiesté qui fait iustice à tous
ses suiets, mais qui protege d’vne façon particuliere ceux
qui font gloire de luy obeyr, & qu’elle a honorez de dignitez
eminentes n’en fut sensiblement touchée, & qu’elle
ne creut mesme qu’vne partie du deshonneur dont on
le couure rejallit sur sa personne : mais quelque foiblesse
que i’apporte à la defence de la verité ; & bien que ie ne
doiue pas esperer d’en parler auec autant d’eloquence
que de iustice, ie croy que si vostre Majesté daigne me
donner vne fauorable attention, elle trouuera bien estrange
que des coupables ayent entrepris de faire condamner
leurs Iuges, qu’on ait arresté le cours de la Iustice par les
armes, qu’on dépeigne le Parlement de Toloze comme
vne Compagnie noircie d’vn des honneur eternel, à cause
qu’il tient pour vne maxime asseurée que les Ecclesiastiques
sont soubsmis à la puissance seculiere, c’est à dire,
SIRE, à celle de vostre Maiesté, que le crime ait ozé
chercher vn azile auprés de vostre personne, où il deuoit
trouuer sa ruine, qu’en mesme temps on vueille en rauir
la connoissance à vos Compagnies Souueraines, & vous
en demander la protection.
 
SIRE, il est certain que comme il n’y a qu’vne vie
dans le corps de chaque animal, il n’y peut auoir qu’vne
authorité souueraine dans chaque Estat, qui se communique
à toutes ses parties, comme la vie se communique
à tous les membres, Cette authorité dans vostre Royaume,
SIRE, est en vous comme en sa racine, & en
vos Parlemens comme en ses branches ; Elle est en vous
comme en sa source, & en vos Parlemens comme en
ses ruisseaux ; leur pourpre n’est que comme vne reflexion
de la vostre ? de mesme que dans la Nature,
lors que deux Iris paroissent à la fois ; la seconde est
tousiours l’image & la production de la premiere, tout