[retour à un affichage normal]

Mazarinade n° B_2_1

Image de la page

Anonyme [1652], REMONSTRANCE AV ROY POVR LE PARLEMENT DE THOLOZE : TOVCHANT L’AVTHORITÉ DES PARLEMENTS. , françaisRéférence RIM : M0_3296. Cote locale : B_2_1.

leur pouuoir n’est qu’vne authorité qui part de
vous, & comme vn rayon de vostre gloire que vous
leur communiquez ; & cela estant ainsi, il est certain
qu’on ne peut pas blesser leur honneur, sans blesser aussi
en quelque sorte le vostre, & que toutes les fois que ce
pouuoir souuerain que vous leur auez départy trouue de
l’empeschement, vostre authorité est arrestée, bien que
ce ne soit pas dans sa source ; & blessée, quoy que ce ne
soit pas en sa racine. Si cela est, ie laisse à iuger à vostre
Majesté quel sanglant affront elle a receu lors qu’à Narbonne,
à la veuë de toute la France, à la veuë du Soleil,
au milieu de ses Estats, au plus haut poinct de l’esclat de
ses armes, & de la prosperité de son regne, on a repoussé
la justice par la violence, on a fermé les portes à des Commissaires
du Parlement, on a leué de gens de guerre contre
des Magistrats, & en faueur des coupables : Nous ne
voulons pas dire encore que tout cela a esté fait par l’ordre
d’vn Archeuesque, pour ne mettre aucune chose
hors de son lieu, & pour pouuoir expliquer les crimes des
rebelles auec ordre. Mais n’est-ce pas assez de dire à vôtre
Majesté, SIRE, que cette authorité souueraine, qui
est l’ame de l’Estat, qui en vnit toutes les parties, qui y
entretient l’ordre & la beauté que nous y voyons, a esté
interrompuë, a esté choquée, a esté repoussée par les
armes.
 
Ie sçay bien, SIRE, que le mensonge est venu au
secours de l’iniustice, qu’on vous a déguisé les choses
d’vne façon bien estrange, qu’on a voulu cacher la laideur
du vice sous la beauté de l’eloquence, qu’on s’est
efforcé de mettre des nuages dorés & peints de belles
couleurs deuant les yeux de vostre Majesté. Ie sçay qu’on
luy a parlé des iustes actions du Parlement de Tolose,
comme d’autant de crimes enormes, & ce n’est pas là peut
estre le plus petit crime des rebelles ; Mais afin que vôtre
Majesté puisse voir la verité de toutes choses, & découurir