[retour à un affichage normal]

Accueil > recherche > Affichage d'une occurrence en contexte

Mazarinade n° B_4_24

Image de la page

Anonyme [1650], REMONSTRANCES TRES-HVMBLES A LA REYNE MERE REGENTE EN FRANCE. POVR LA CONSERVATION DE l’Estat, pendant la minorité du Roy son Fils. , françaisRéférence RIM : M0_3343. Cote locale : B_4_24.


qu’il croistra, à fin que cette façon se moule en luy, &
qu’estant paruenu en vn aage meur, le trauail ne luy soit
que jeu : l’œil du maistre rend le champ fertile, & le cheual
gras, ainsi la cognoissance que le Prince prend de ses
affaires, fait que ses Conseillers les manient à point.
 
Nourrissez-le, esleuez-le, non dans vne prodigalité,
ains sage liberalité, digne d’vn grand Roy, representez-luy
à toutes heures, que sçachant vser de cette vertu, &
où, & comment, & quand il en est besoin, le bien-fait
retournera sur luy, & plus de bien il donnera plus il luy en
reuiendra.
Si vous souhaitez qu’il plaise premierement à Dieu, puis
au peuple, qu’on dresse entierement son esprit à la clemence,
dont il a vn merueilleux miroir & exemple deuant ses
yeux, par la memoire du feu Roy son pere, vostre honoré
Seigneur & espoux. C’est vne grande sa gesse, & le propre
d’vn grand cœur de clorre selon les rencontres, l’œil aux
offences qui luy sont faites parmy vn grand pouuoir, qui
peut sans controle se vanger des plus petites.
Ce sont les vertus que nostre Roy doit succer dés cette
basse ieunesse, qui prendront nourriture auec luy, & viendront
peu à peu à tel accroissement, qu’elles le feront vn
iour dire & reputer le vray pere du peuple.
Et d’autant qu’en vne fontaine publique, l’interest commun
est, que l’on n’y iette des ordures, aussi que dedans
nostre Roy, resource generale de tout son peuple, ne
tombe chose déhonneste : c’est pourquoy il faut prendre
garde de prés quand il entrera dans ce feu de ieunesse, qu’il
ne laisse aller à toute bride sa volonté dedans la volupté, &
que pouuant ce qu’il veut, il ne vueille ce qu’il ne doit ;
Parce que de la grande licence aux grand vices, la pante est
si doux-coulante, que presque elle est insensible. Pour cette
cause il luy faut enseigner de bonne heure, l’honneur, la
gloire & loüange, qu’il rapportera d’vne continente ieunesse,
& au rebours comme Dieu excitera sa colere contre
luy s’il mal-vse de sa toute puissance encontre la chasteté.