[retour à un affichage normal]

Mazarinade n° A_8_54

Image de la page

Anonyme [1649], REMONTRANCE DE LA REINE D’ANGLETERRE A LA REINE REGENTE, touchant la mort de son mary à l’estat present. , françaisRéférence RIM : M0_3304. Cote locale : A_8_54.

peu empescher ce desastre : il est mort, mais de dire
par quelle mort, ce seul recit peut attirer la mienne ;
puis que l’horreur de cette catastrophe doit estonner
les plus hardis, & toucher les plus insensibles : Ie
ne puis vous le dire, Madame, puisque mes regrets
arrestent ma plume, & l’empeschent de couler, me
voyant dans vn si grand desordre. Vous le sçauez,
toute la France le sçait, & toute la terre en est desia
imbuë. Mais en quel temps est-il mort ? au temps que
toute la terre estoit pleine de dissentions & de guerres,
& que tous les Suiets sembloient se reuolter contre
leur Roy. Nous auons sçeu & vous & moy, comme
les Espagnols ont voulu assassiner leur Roy vostre
frere. Nous auons sçeu comme les Ianissaires
ont fait mourir leur Sultan Hibraym pour faire regner
son fils. Nous auons sçeu comme le Roy de la
Chine s’est veu depoüillé de presque toutes ses Prouinces.
Naples n’a elle pas voulu secoüer le ioug
d’Espagne ? Et Rome mesme n’a elle pas murmuré
contre le Pape ? Et la Seigneure Olympia sa niepce,
pour la cherté du bled, & c’est en ce deplorable
temps, où il sembloit que les Souuerains deuoient
descheoir de leur authorité, & voir leur Royaumes se
metamorphoser en des Republiques, & où les ennemis
de la Couronne d’Angleterre ayant veu que rien
ne pouuoit s’opposer à leurs desseins, ont fait mourir
leur Roy sur vn échaffaut, & se sont depoüillez de toute
l’affection qu’ils luy auoient auparauant tesmoignée.