[retour à un affichage normal]

Mazarinade n° C_10_36

Image de la page

Anonyme [1649], TRAITÉ DE PAIX DE L’AME AVEC SON DIEV, DE DIÉ A MONSEIGNEVR DE BEAVFORT, DVC ET PAIR DE FRANCE. Propre à ce Saint temps. , françaisRéférence RIM : M0_3797. Cote locale : C_10_36.

sacrifice est destiné pour les pecheurs : ce Sang respandu est
vn Baûme precieux dont la vertu doit couler dans mon ame,
en le receuant sainctement. Ie m’y dispose, mon Seigneur, si
vous jettez les yeux sur ma foiblesse, ie me surmonteray moy-mesme,
secouruë de vostre grace, que ie ne puis esperer que
d’vne Bonté Paternelle. Sauuez-nous, abysme de misericorde,
source de bonté & de grace : Ie vous adore profondement
dans le tres-Saint Sacrement de l’Autel, aneantie dans la connoissance
que vous auez de ma misere ; ne me reseruez point
à ce jour de la vengeance, qui doit estre le moment decisif de
mon Eternité ; Mais dés à present percez mon cœur, de la
crainte de vos Iugements, & que i’apprehende viuement ce
que ie ne sçaurois vn iour éuiter ; Ie me veux conuertir, mon
aimable Sauueur, s’en est fait, à ce moment ie me reconnois :
mais si vous ne me prestez la main fauorable, pour sortir de
ce precipice, où le peché m’a engagé ; ie ne me releueray iamais :
tendez-moy les bras mon Sauueur, vous les tenez ouuerts
sur la Croix, c’est pour m’embrasser, apres m’estre éloigné
par mes injustices, du chemin de la verité. C’est vous que
ie reconnois Autheur de ma justification, & dont j’adoreray à
iamais la profondeur des Iugements, & la source d’vne Bonté
infinie. Vous m’auez racheté au prix de vostre Sang, pourriez-vous
voir auec asseurance la destruction de vostre ouurage,
le pouuant reparer auec vne goutte de sang : Ie suis vostre
heritage de la Croix, acquis par tant de sueurs & de trauaux.
Conseruez, mon Dieu, cette Creature, qui ne desire que de
vous posseder, prosternée humblement à deux genoux, les
larmes aux yeux, le sanglot dans la bouche, & la Contrition
dans le cœur ; elle vous demande pardon, presente satisfaction
pour ses offenses, ne luy refusez pas l’entrée à vos