[retour à un affichage normal]

Mazarinade n° D_2_6

Image de la page

Anonyme [1649], TRES-HVMBLE ET CHRESTIENNE REMONSTRANCE A LA REYNE REGENTE. Sur les mal-heurs presens de l’Estat. , françaisRéférence RIM : M0_3807. Cote locale : D_2_6.

de preuenir ce desordre, & de vous souuenir que le Roy vostre
fils ne peut rien moins attendre & vos soins, qu’vn gouuernement
plein de gloire & de succez ; se promettant que vous luy
remettrez entre les mains son Estat aussi heureux & aussi paisible,
comme le Roy son pere vous l’aura laissé : Ce fut pour luy
donner la paix & porter la tranquilité dans le sein de son
Royaume, que ce Prince aussi iuste que victorieux a porté ses
conquestes au delà de ses bornes ; afin que luy donnant part
aux succez de la guerre, il l’exemptast à mesme temps des miseres
qui l’accompagnent, & qu’il en esloignast les moindres
disgraces.
 
CE fut dans ce dessein qu’il prodiga ses finances, qu’il a espuisé
les veines, le sang & la vie de tant de Noblesse, & la seule
passion de conseruer Paris, comme le cœur qui inspire le
peu de vie qui luy reste à toutes les parties du Royaume, l’a
engagé en mille combats, l’a reduit à soustenir des assauts sans
nombre dessus la frontiere, & a estendre ses armes sur les terres
ennemies. Et cependant le seul desir d’vne vengeance, porte
le feu au milieu de cette place qui a fait les delices de nos
Roys ; Et les sueurs & les fatigues de plusieurs années vont estre
enseuelies dans les vaines esperances conceuës, par vn esprit
de fort peu de iours.
QVOY la memoire du feu Roy Louys le Iuste, Prince plein
de clemence & de pieté ? La presence du Roy vostre fils dont
le Ciel & les vœux de toute la France vous ont fait la Mere ? L’estime
du plus Chrestien & du plus pieux de tous les Royaumes ;
La consideration de tant de sujets qui n’ont que des sentimens
de respect & d’honneur pour vostre Majesté, ne pourront flechir
vn cœur, qui n’a peû estre irrité que par les Ennemis de
l’Estat ? Et ne pourront changer vne resolution, dont l’effet est
la derniere de toutes les extremitez ?