[retour à un affichage normal]

Mazarinade n° C_3_70

Image de la page

B. D. [signé] / Cyrano de Bergerac, Savinien de [?] [1649], LETTRE DE CONSOLATION ENVOYEE A MADAME LA DVCHESSE DE ROHAN, SVR LA MORT DE FEV MONSIEVR LE DVC DE ROHAN SON FILS, SVRNOMMÉ TANCREDE. , françaisRéférence RIM : M0_1922. Cote locale : C_3_70.

preparée à cette seconde perte.
 
Mais, MADAME, ie n’ay que faire d’exemples ny
de raisonnemens prophanes, puis que ie m’addresse à
vne personne, qui a adiousté toutes les vertus Chrestiennes
aux vertus morales, & qui est l’honneur de
sa religion, aussi bien que de son sexe. Ie ne veux que
la faire souuenir de cette merueilleuse priere que Dieu
enseigna luy mesme aux hommes, vous ne la dites
iamais, Madame, & ie sçay que vous la dites tres-souuent,
que vous ne promettiez de renoncer à vos
propres sentimens, & de vous resigner à ses volontez.
Vous ne pouuez douter qu’il n’ait bien voulu retirer
à luy cet illustre persecuté dans l’innocence, ou
la tendreste de son âge, & les trauerses le tenoient encores,
possible ne luy eust-elle pas duré dans vn âge
plus auancé, & parmy les caresses de la fortune, &
possible qu’estant remis dans vn heritage temporel, il
eust perdu celuy qu’il possedera eternellement. Voila
des raisons bien communes, on les allegue à tout le
monde ; mais c’est vne marque de leur excellence, &
les remedes qui sont les plus en vsage, sont ceux-là
qui ont le plus d’efficace, Dieu veüille benir ceux-cy
pour vostre soulagement, & pour la satisfaction de
celuy qui est
MADAME,
Vostre tres-humble, & tres-obeyssant
seruiteur, B. D.