[retour à un affichage normal]

Mazarinade n° B_16_59

Image de la page

Bourbon, Henri de [signé] [1652], MANDEMENT DE HAVT & puissant Prince Monseigneur HENRY DE BOVRBON, Euesque de Metz, Abbè de l’Abbaye S. Germain dez Prez. Pour la Procession generale & solemnelle ou sera portèe la Chasse de S. Germain, le Dimanche 16. du present mois de Iuin. 1652. , françaisRéférence RIM : M0_2345. Cote locale : B_16_59.

bien-heureux sainct Germain, tres illustre Prelat &
pere des Parisiens ; lequel, ainsi qu’asseurent les Annales
Ecclesiastiques, a esté eleué à cette dignité par vne tres grande
faueur de Dieu en vne saison extremement facheuse, afin que l’esclat
de ses vertus esclairât non seulement toute la France, mais encore
tous les Peuples de l’Occident : Iustement serions nous
frustrez de nos desirs, si nous ne tâchions d’obtenir par ses
merites, ce qui a esté refusé à nos indignitez. Ce grand
Pontife ayant eu le domaine des Elemens, comme tesmoignent
ses infinis miracles ; & ce qui est encore plus,
ayant eu les cœurs des Roys en son pouuoir, ainsi qu’il a
paru en Childebert & Clotaire : ayant esté la consolation
des pauures & affligez par ses aumosnes innombrables :
ayant protegé & vangé la Ville de Paris, auec vne si terrible
puissance qu’il a contraint mesmes les infideles à prescher
ses victoires : ayant esté enflammé d’vn zele tres-ardent
pour le salut des ames, comme ont fait voir ses trauaux
& Predications ; Enfin estant, selon le tesmoignage
de Fortunat le Moyse de la France, & selon vn autre, le Bouclier
des Parisiens : il possede toutes les conditions d’vn Intercesseur
tel que nous auons besoin au milieu des perils,
qui menacent tout ce Royaume : comme l’ont esprouué
nos Ancestres, & singulierement en 1587. lors que
ses precieuses Reliques furent portées solemnellement
en procession, y assistant le Roy Henry III. accompagné
des Cardinaux de Bourbon & de Vendosme,
Monsieur le Comte de Soissons, & autres Princes &
Seigneurs de sa Cour. Et peut estre Dieu a il differé
de nous faire misericorde, parce que nous n’auons pas
assez recognu que ce grand Prelat est encore vn Aaron
qui presente le parfum de ses prieres pour la paix des viuans &