[retour à un affichage normal]

Mazarinade n° C_10_51

Image de la page

D. L. [1649], LE VISAGE DE BOIS AV NEZ DV MAZARIN. ET SON EXCLVSION DE LA Conference qui se tient à Ruel. Par le Che. D. L. , françaisRéférence RIM : M0_4032. Cote locale : C_10_51.

assez de generosité pour ne point plier sous
les honteux liens de sa Tyrannie : la Vertu souffre
trop de contrainte sous le gouuernement des
méchans, c’est lors qu’elle n’agit pas selon ses sentimens,
& qu’elle est forcée de ceder à la corruption
des vices. Celuy qui ne sçait pas corriger le
déreglement de ses passions, est inhabile à l’administration
de la Monarchie Françoise.
 
Nous ne pouuons souffrir que le gouuernement
de nos Roys, qui n’a point de raport auec la seruitude,
puisque la liberté des bons suiets se conserue
dans la iustice de leur Prince, & que l’iniuste peut
mesme quand il veut se rendre libre sous vn semblable
gouuernement : En effet, la sujetion peut
durer sous le regne d’vn Monarque ; mais il n’en est
iamais l’autheur : & si la liberté consiste à faire ce
que l’on desire, ce n’est que le mauuais suiet qui
peut deuenir Esclaue, pource que ne faisant ce
qu’il veut, il n’agit que par la crainte de la iustice
de son Souuerain ; Mais si celuy-là n’est pas libre,
il est aussi indigne de l’estre, & s’il deuient serf,
ce n’est pas par le gouuernement du Prince, puisque
c’est le seul effet de son peché qui change sa
condition.
Cét Ennemy de tous les gens de bien, veut-il en
s’approchant de vous, combattre vostre prudente
ciuilité, de son arrogance & outrecuidance ? Ose-t’il
encore se presenter deuant ceux qui ne le peuuent
iustement regarder que dessus la Selette ; vostre
generosité seroit-elle satisfaite de perdre l’inimitié