[retour à un affichage normal]

Mazarinade n° D_1_3

Image de la page

Morgues, Mathieu de [1643], LES DEVX FACES DE LA VIE ET DE LA MORT DE MARIE DE MEDICIS ROYNE DE FRANCE VEFVE DE HENRY IV. MERE DE LOVYS XIII. ROYS TRES-CHRESTIENS. DISCOVRS FVNEBRE. Par Messire MATTHIEV DE MOVRGVES Sr. de Sainct Germain, Docteur en Theologie, premier Aumosnier & Predicateur de ladite DAME ROYNE; Predicateur du ROY CATHOLIQVE, & Preuost de Harlebeke en Flandres. DEDIÉ A LA ROYNE CATHOLIQVE. , français, latinRéférence RIM : Mx. Cote locale : D_1_3.

Roy dans le Parlement, & par des lettres patentes,
remplies de louanges pour la fidelité & prudence de
son gouuernement. O quelle belle face de prosperité
dira celuy qui ne voit que le visage de Noëmi, qui
signifie belle, non celuy de Mara, qui veut dire amere ?
Ne regardons pas seulement d’vn costé ce tableau à
deux rapports ; allons à la gauche, qui pleure, aprés
l’auoir consideré à la droite, qui rit. Dauid en ce
Cantique remply de mysteres, qui ne chantent autre
chose que l’Epithalame de Dieu auec son Eglise, a dit :
Toute la gloire de cette fille de Roy vient du dedans,
elle à vne frange d’or enuironnée de diuersitez.
Cette robe à fonds d’or est la prosperité ; les broderies
diuerses sont les afflictions qui l’ont persée pour
l’embelir. Les versions differentes l’expriment
mieux, lors qu’elles nous disent, que la tissure de la
robe est de boucliers, qui monstrent qu’elle sera
attaquée, & dans la defensiue. Les autres disent, que
cette broderie sera en eschiquier, où on va du blanc
au noir pour faire cognoistre, que dans le cours de la
vie des plus grandes Roynes, & mesme en celle de
l’Eglise de Dieu, on voit les aduersitez meslées auec
les prosperitez. Nous pouuons dire aussi, que le
passage des puissances plus releuées est vn liure de
musique, qui a autant ou plus de notes noires que de
blanches. Vn autre interprete dit, auec vne robe
semée d’yeux ; pour nous faire entendre, que si ce