[retour à un affichage normal]

Accueil > recherche > Affichage d'une occurrence en contexte

Mazarinade n° A_6_83

Image de la page

Trabit [signé] [1649], ORDRE ET REIGLEMENT QVE DOIVENT TENIR ET garder les Soldats & Gens de guerre à pied. Extraict des Registres de la Connestablie & Mareschaussée de France, au Siege general de la Table de Marbre du Palais. , françaisRéférence RIM : M0_2629. Cote locale : A_6_83.



12. Les Capitaines fassent chacun en leurs bandes, que tous soldats obeyssent
à leurs Sergens, & caps d’esquadre ou caporaux en leurs offices, sans
les iniurier, sur peine (si l’iniure est verbale) de luy demander pardon deuant
toutes les bandes : & si elle est de faict, d’estre passé par les picques.
13. Le soldat qui en querelle donnera cry d’vne nation, sera passé par les
picques.
14. Celuy qui commencera vne mutination, sera passé par les picques.
15. Quand vne querelle suruiendra entre deux, ou plusieurs, nul, s’il n’est
Capitaine ou Officier, n’y pourra porter armes, autres que son espée, sur
peine de confiscation d’icelles, & punition arbitraire du Colonnel.
16. Si vn Capitaine ou Officier de bande suruient en vne querelle, & qu’il
trouue quelques soldats ayans l’espée au poing, soudainement qu’il criera
pour les départir, ceux qui auront mis l’espée au poing ne pourront plus tirer
nul coup, sur peine d’estre passez par les picques.
17. Le soldat s’il a querellé à vn autre, ne pourra s’accompagner, sur peine
que luy ou ceux qui l’accompagneront, seront passez par les picques.
18. Le soldat qui de guet-à-pend, meschamment, & auec aduantage, blessera
& tuëra vn autre, sera passé par les picques.
19. Le soldat qui sans legitime occasion dira iniure qui touche l’honneur
d’vn autre, ladite iniure & honte retournera à luy-mesme, & luy sera declaré
deuant toutes les compagnies.
20. Quand vn soldat auec auantage aura fait desdire vn autre de quelque
chose, le Capitaine à qui sera l’assaillant, luy fera demander pardon à l’assailly,
estant la desdite nulle, & ledit assaillant banny des bandes.
21. Le soldat qui sans iuste occasion démentira vn autre, sera mis en la place
publique, & enseigne desployée, & teste nuë, demandera pardon au Colonnel,
& à celuy qu’il aura démenty.
22 Le prouocateur d’vne querelle sans legitime occasion ne sera receu à
combatre, mais puny selon son démerite, à la discretion du Colonnel.
23 Le soldat qui donnera vn soufflet à vn autre, pour moindre occasion
que d’vn dementy, en receura vn autre de celuy à qui il l’aura donné, en la
presence du Colonnel, ou du Maistre de camp, & sera banny des bandes.
24 Quand deux soldats auront vne querelle, se retireront à leurs Capitaines,
qui regarderont à les accorder, lesquels en communiqueront au
Maistre de camp, & là où ils ne les pourront appointer, feront entendre le
faict au Colonnel, pour en ordonner la raison.
25. Quand vn soldat refusera à vn autre de payer ce qu’il luy doit, le creancier
se retirera au Capitaine du debiteur, qui le fera payer au monstres, sans
venir par voye de question, sur peine arbitraire.
26. Nul soldat ne pourra presenter camp, n’enuoyer cartel à vn autre, sans
licence du Colonnel, sur peine d’estre desgradé des armes, & banny des
bandes.
27. Le soldat qui outragera vn autre, ou desgainera sur luy, estant en guet,
ordonnance ou faction, sera passé par les picques.
28. Celuy qui mettra la main aux armes dedans la ville & place de garde,
perdra le poing publiquement.