Mazarinade n° C_1_19
Image de la page
Anonyme [1649], LA CONFERENCE DV CARDINAL MAZARIN AVEC LE GAZETIER, Iouxte la coppie Imprimée à Bruxelles. , françaisRéférence RIM : M0_742. Cote locale : C_1_19.
seruoient de motif, & que i’auois forgées. I’y adioustay les Generaux
sollicitez, à ce que ie disois par de semblables interests, sans
pardonner au Coadiuteur, quoy que mon Euesque, faisant croire
au peuple qu’il ne luy donnoit des benedictions que pleines de
despit, de ce que V. E. n’auoit pas voulu timbrer sa Mittre du
casque du gouuernement de Paris. Ce fut en semant ces libelles
que le Cheualier de la Valette fut pris & conduit prisonnier en la
Conciergerie, ou son procez luy estant fait, on l’eust racourcy de
toute la teste, aussi bien que de ses meubles, si Monsieur le Prince
de Condé n’eut pas escrit à Monsieur de Boüillon, qui fut cause
qu’au lieu de l’arrester en gréue, on le conduisit à la Bastille, où il
est encore. Et c’est de-là qu’au lieu de remercier le Parlement de
la grace qu’il luy auoit faicte, i’ay trouue l’artifice de le blasmer &
de le faire passer pour factieux, rebelle & criminel dans l’esprit du
peuple, en disant qu’ayant tant fait d’instance enuers le Roy, pour
ne pas retenir des prisonniers plus de vingt-quatre heures sans leur
faire leur procez, il laissoit neantmoins gemir des innocens depuis
trois mois dans les cachots de la Bastille, sans sçauoir pourquoy
ils y estoient detenus : ce qui estoit vne marque certaine de
leur arrogance, & de leur ambition, pour esleuer leur tyrannie au
dessus de l’authorité du Roy. Qui iamais se fust avisé de cette fourbe ;
qui eust cru qu’elle eust esté sans effet ? Mais qui n’eust pas cru
dans ce commencement que les esprits estoient encore estourdis
de la surprise causée par l’enleuement du Roy, ne voyant plus les
boulangers de Gonnesse, & apprehendant de n’auoir plus du pain,
ne se fussent saisis de ceux que l’on leur disoit estre les causes de
leur mal, & ne les eussent iettez dans la riuiere ? Et neantmoins
au contraire, cela ne fit, se semble que leur ouurir les yeux, & les
obliger de s’vnir plus fortement pour la protection & la defence du
Parlement, & l’huile que l’on pensoit deuoir allumer le feu de leur
colere contré ces Messieurs, ne fit que l’acroistre contre vous, auec
tant d’ardeur, que si on les eust voulu croire, ils fussent venus la
teste baissée vous enleuer de Sainct Germain, & faire vn arrest personnel,
au lieu de celuy qu’ils ont fait imprimer, & enuoyé par
toutes les Prouinces.
Le Card. Il est vray que cela a quelque apparence d’abord, & qui
semble surprendre vn esprit qui ne suit que ses sens, sans autre reflection.
Mais pour peu qu’on vueille l’éplucher l’artifice est trop
grossier pour n’estre pas connu. Il n’en falloit pas tant dire, & encore
le falloit- il faire d’vne autre maniere. Ce n’est pas le moyẽ d’arrester
Image de la page