[retour à un affichage normal]

Accueil > recherche > Affichage d'une occurrence en contexte

Mazarinade n° C_9_88

Image de la page

Anonyme [1649], LE ROY DES FRONDEVRS. ET COMME CETTE DIGNITE est la plus glorieuse de toutes les dignitez de la Terre. Contre le sentiment des esprits du Siecle. , françaisRéférence RIM : M0_3556. Cote locale : C_9_88.


Qu’auõs nous veu du depuis, que des Denys
& des Busires ? Ie m’etonne que la terre ne s’entr’ouure
pour nous engloutir, & que le Sauueur de nos
ames nous vueille souffrir dauantage dans vne vie si
detestable. Nostre illustre Frondeur sçait bien ce
qu’il faut rendre au Prince ; mais il n’ignore pas aussi
de quelle sorte il faut traiter ceux qui abusent de son
authorité, pour perdre l’Estat & le Peuple. Les Tyrãs
vexent le Peuple de Subsides & d’exactions immoderées,
& ce digne Frondeur les soulage dans leurs
necessitez plus pressantes. Le Tyran administre les
affaires de la Monarchie par fraude & par auarice, &
ce digne Frondeur les conduit auec vne parfaite integrité
de conscience. Le Tyran ne se gouuerne que
par des flateurs, des satrapes, & telles autres especes
de vermines, & ce Frondeur sans exemple, n’execute
iamais rien que par vne admirable prudence. Le Tyran
est tousiours en apprehension que le Peuple ne
conspire contre luy, & nostre illustre Frondeur ne
sçauroit estre iamais en plus grande seureté, qu’au
milieu de la capitale Ville de cet Empire. Le Tyran,
à ce que nous apprend le Prophete Ezechiel, est
vn loup rauissant, prest à respandre le sang de tout le
monde ; mais nostre adorable Frondeur traite les
sujets du Roy, comme vn bon Pere de famille traite
ses enfans, ou comme le bon Pasteur traite le troupeau
de sa Bergerie. Et sans considerer qu’il est issu
du plus noble Sang de la terre, & d’vn Prince qui faisoit
trembler tout le monde, sa bonté enuers le Peuple
est vne marque infaillible de son merite. Dauid
est loüé de Saül, & nostre grand Frondeur est benit
de tous les Habitans de France. Dauid estoit le plus
petit de tous ses freres, & nostre Frondeur est le plus
ieune de tous les siens. Dauid faisoit toutes choses,
afin que le Dieu d’Israël fut glorifié, & nostre Frondeur
fait tout ce qu’il peut pour la France, afin que le