Mazarinade n° A_2_32
Image de la page
Anonyme [1649], DECISION DE LA QVESTION DV TEMPS. A LA REYNE REGENTE. , françaisRéférence RIM : M0_871. Cote locale : A_2_32.
vostre corps, serue d’instrument au demon, pour inspirer dans
l’esprit d’vne si vertueuse Princesse des sentiments si barbares ?
Et que vostre chair viuante & vostre sang tour boüillant, puissent
compatir auec eux, dans vn mesme cœur, des Maximes si cruelles
& si inoüyes ?
Que vostre Majesté, Madame, pardonne ce transport à ma
douleur, c’est pour son interest & non pour le mien que ie me
sens animé : l’honneur qu’elle me fait de m’escouter quelquesfois
& de me communiquer auec confiance de ses actions de pieté,
ne permet pas que ie souffre auec silence, l’outrage signalé que l’on
fait en ce point & à sa conscience & à son honneur. Il faut que
ie crie & que ie fasse violence, pour la garentir des mains de ces
harpies, qui s’efforcent par ces malheur eux dogmes, de sacrifier son
ame aux enfers, & sa reputation à vne infamie eternelle. Ouy,
Madame, c’est leur but, & non pas le repos de vostre cœur. Ils tachent,
comme Satan fit à nostre Seigneur, de seduire vostre creance
sous le manteau de la vertu, sçachant bien qu’ils n’en viendroient
pas à bout sous celuy du vice ; & apres, mais en vain, auoir
employé tous leurs effors, pour rendre vos mains sacrileges en les
armant contre le sanctuaire, ils les arment contre le peuple sans
distinction de sexe, d’age, ny de profession ; afin qu’ils fassent par
cette voye ce qu’ils n’ont pû faire par l’autre, & que le sang des enfans
à la mamelle meslé auec celuy de leurs meres, celuy des Prestres
parmy celuy des Laïques, & celuy des Vierges consacrées à
Dieu auec celuy des autres filles, ils dressent vne hecatombe aux
demons, du corps, du sang & de la vie des innocens, & de l’ame de
vostre Majesté.
Ie ne doute point, Madame, que ces paroles ne vous touchent ; ie
sçay que vostre Majesté ne les pourra lire sans fremir, & qu’elles
luy glaceront le cœur ; mais la preuue luy en fera cognoistre la verité,
/> à la confusion de ces faux Profetes, à la gloire de Dieu, au bien
du Roy & de ses Suiets, & à sa propre consolation. Les Parisiens
dit-on, sont rebelles, il les faut punir & les exterminer, il n’y a
point de peché, au contraire il y a obligation, afin de maintenir
l’autorité du Roy, à quoy vostre Maiesté s’est engagée par serment,
lors qu’elle a accepté la Regence. Ainsi, Madame, s’ils sont rebelles,
vous auez raison ; mais s’ils ne sont point rebelles, mais au
contraire fideles Suiets & seruiteurs, il faut que vostre Maiesté aduoüe
Image de la page