[retour à un affichage normal]

Accueil > recherche > Affichage d'une occurrence en contexte

Mazarinade n° A_2_38

Image de la page

Anonyme [1649], LA DISGRACE DV CARDINAL MAZARIN ARRIVEE DEPVIS LA la Conference de Ruel. , françaisRéférence RIM : M0_1156. Cote locale : A_2_38.


les vns persecutant leurs parens mesmes
comme Herodes, les autres des peuples qu’ils
auoient capidez, comme Pharaon & Nabuchodonozor,
les autres leurs subjets, & d’autres aussi
leurs Compatriottes, sur lesquels il n’auoient aucune
legitime domination : mais seulement vne
puissance tyrannique qu’ils auoient vsurpez contre
tout droict & raison. Mon discours seroit trop
ennuyeux si ie voulois parcourir, & vous dechiffrer
toutes les choses de cette nature, c’est pourquoy
ie me contenteray de vous depeindre la qualité
du supplice, dont est affligé maintenant le
Cardinal Iule Mazarin, cy deuant grand Ministre
de France & pour l’heure le but de la haine la plus
vniuerselle qui fut iamais, & le iouet mal-heureux
de la fortune. C’est vne grande marque de bassesse
& de stupidité que de vouloir immortaliser ce qui
est corruptible par essense, c’est vne extreme folie
que de penser affermir l’instabilité du sort & c’est
vne ignorance insupportable de n’en reconnoistre
pas la malice Les anciens auoient bien raison d’estimer
ceux là sages & prudents qui ne se fioient
aucunement à la fortune ; quoy qu’elle les eust
esleué au plus haut de sa rouë, aussi les grandeurs
ne doiuent estre considerees de ceux qui les possedent,
que comme des serpens venimeux qui le