[retour à un affichage normal]

Accueil > recherche > Affichage d'une occurrence en contexte

Mazarinade n° C_5_11

Image de la page

Anonyme [1649], LA FIN TRAGIQVE DE TOVS LES PARTISANS, ARRIVEE DE TEMPS EN TEMPS, ET TIREE DE L’HISTOIRE DE FRANCE. , françaisRéférence RIM : M0_1395. Cote locale : C_5_11.


arrester le bras prest à s’appesantir dessus ce fameux criminel :
mais de dire que le Cardinal veüille auoir des creatures,
& faire regner les meschans auec luy, c’est ce que ie
trouue insupportable : & c’est ce que ie pretens faire voir
n’estre iamais encore arriué, si ce n’est de nos iours. Que
Mazarin protege les Financiers, & par consequent les meschans,
il est facile de le montrer par les oppositions qu’il fit
à l’establissement de la Chambre de Iustice, & par les retardemens
qu’il y apporta du depuis : mais quel besoin auons
nous de preuues, quand il l’auoüe luy mesme, & qu’il
fait vanité de n’auoir pas laissé perir cette maudite canaille.
 
Certes la France sous son ministere est trop accoustumée
à verser le sang des innocens, pour vouloir commencer si
tard à répandre celuy des coupables : Le Cardinal s’auise de
se montrer plus doux : car apres auoir tiré tout le bon sang
des François, il croit qu’il est encore temps de fermer leur
veine, & de conseruer le meschant qu’il leur reste. Pitoyable
action, il veut ie croy donner temps à ces voleurs de faire
restitution, & de se conuertir, il ne veut pas la mort des
pecheurs, il n’en veut qu’à nos iustes. Doncques ame cruelle
& barbare, la France n’étouffera que ses enfans legitimes,
elle ne foulera que ses veritables sujets, & vous voulez
ie croy par droit d’hospitalité qu’elle nourrisse des monstres
estrangers tels que vous, & ceux qui l’ont pillée. Ie
sçay que c’est contre les maximes de l’estat present, & contre
les regles de vostre politique de punir les criminels ; ie
sçay que c’est vne chose preiudiciable à l’authorité royalle
que vous auez vsurpée, & que vouloir faire le procez aux
Partisans, c’est vouloir faire le vostre, puisques vous vous
estes treuué depuis cinq ans dans tous les parties les plus infames :
mais comme les moindres des accusations dont
vous estes chargé, sont celles de vos rapines, ie vous conseille
de reprendre vos esprits égarez, pour venir voir auec
moy de quelle sorte de toute ancienneté l’on a puny ceux
que vous deffendez, & sans apprehender leur supplice, puisques
vous en meritez vn plus grand, apprenez comme les
Financiers vos complices se sont de tout temps mespris dans