[retour à un affichage normal]

Mazarinade n° C_5_22

Image de la page

Anonyme [1649], LA FVREVR DES NORMANS CONTRE LES MAZARINISTES. , français, latinRéférence RIM : M0_1460. Cote locale : C_5_22.

nous le contraindrons de dire, à furore Normanorum,
libera me Domine. Diuine fureur ! tu es le
repos des bons & la terreur des meschans. C’est toy
qui portes les vengeances de Dieu sur les peruers.
C’est toy qui as fait dire au Roy Dauid, Domine ne
in furore tuo arguas me. C’est toy (s’il est permis de
mesler les choses profanes auec les diuines) qui animois
Alexandre dans les combats, & qui luy donnant
vne longue suitte de victoires, luy as donné
vn Royaume qui n’auoit point d’autres bornes, que
celles du monde entier. Puisque tu es fille du Ciel,
nous soupirons apres tes ardeurs, & nous faisons
gloire d’estre furieux, puisque tu es le Soleil qui fais
naistre les Palmes. Puisque tu nous rends inuincibles,
nous ferons monter nos victoires iusques sur
son Eminence. Ton feu eschaufant nos cœurs d’vn
noble desir de combatre, nous nous despoüillons
de nos propres interests, comme d’vne chemise que
nous auons portée il y a long-temps, pour nous reuestir
de ceux du public, comme d’vne robe Royale :
Et nous quittons nos miseres dans nos maisons,
comme vn fardeau sous lequel nous gemissons il y a
longtemps, pour aller chercher nostre bon heur
dans les combats, lesquels ont de plus fortes chaisnes
pour nous attirer, que nos familles pour nous retenir.
Nous estoufons l’amour de nos maisons dans vne
genereuse adoption de tout le Peuple de France, à
l’exemple de ces deux Romains, dont l’vn ne vouloit
point auoir d’autre qualité, que celle de Pere public,
& l’autre ayma mieux estre pere cruel, que Cõsul