[retour à un affichage normal]

Accueil > recherche > Affichage d'une occurrence en contexte

Mazarinade n° B_14_17

Image de la page

Anonyme [1652], AVX FRANÇOIS FRATRICIDES, PAR VN ECCLESIASTIQVE. , françaisRéférence RIM : M0_436. Cote locale : B_14_17.


pas dire auec verité de tant de sang que vous respandez ?
Vt quid perditio hæc ? A quoy reuient cette perte de
tant de sang. Quoy faut-il bouleuerser vn Royaume, inquieter
& destruire, & remplir d’horreur & de sacrilege
la France, qui estoit le chef-d’œuure de la nature pour
l’humanité, & dans la religion l’exemplaire de la pieté ?
Faut-il exposer à la risée des nations estrangeres, à l’opprobre
de tous les siecles, & au joüet des escriuains vostre
patrie, pour ie ne sçay quoy qu’on ne sçauroit dire, qui
l’occupe, l’embarasse, la mine, & la destruit, sans que
personne du dehors la pousse à sa ruine ; & qui semble se
vouloir arracher de ses propres mains sa reputation, son
repos & sa vie : & qui depuis vn si long temps plus elle
se veut démesler de ses filets, s’y est d’autant plus enlassée.
 
Mat. 26. 8.
Est-il possible qu’il ne se rencontre pas dans vn si vaste
Royaume, remply de personnes de sçauoir, d’authorité
& de pieté, quelqu’vn qui se iette entre deux, & comme
vn Moïse François vous represente vostre naissance &
vostre Religion ; & fasse ce qu’il est dit de Moïse, adopté
par la fille de Pharaon, & nourry dans la Cour. Reconciliabat
eos in pace, dicens : Viri, fratres estis, vt quid nocetis
alterutrum ? Il taschoit de les remettre en paix, leur
disant ; Que faites-vous, Messieurs, vous estes tous Iuifs,
de mesme naissance & religion, & ainsi freres, pourquoy
cherchez-vous à vous faire du tort, & vous apporter du
dommage ? Ce qui fut en effet le fondement de l’exaltation
de Moïse ; car apres cette action, s’estant retiré au
desert, Dieu luy apparut dans le buisson ardent, & luy
donna la commission d’enleuer des mains de l’Egypte
son peuple à force de prodiges, & de coups redoublés de
la verge qu’il luy mit en main ; tant il est vray que Dieu
benit ceux qui entreprennent la reconciliation, & font
les affaires de la paix.
Act. 7. 26.
Ne soyez pas cause que Dieu retire tout à fait de la
France son secours fauorable ; n’entrez point en presomption,
pour la singuliere protection qu’il luy a si souuent