[retour à un affichage normal]

Mazarinade n° B_5_34

Image de la page

Anonyme [1652], LA GENEREVSE RESOLVTION DE SON ALTESSE ROYALE DANS LA DERNIERE ASSEMBLÉE DV PARLEMENT: Par laquelle on peut connoistre tres-asseurement le desir qu’il a de donner la Paix Generalle, & le repos à toute la France. , françaisRéférence RIM : M0_1479. Cote locale : B_5_34.

pour opiniâtrer qu’il falloit donner ledit Arrest, sans
juger si cela se pouuoit faire, sauf l’honneur de ladite
Cour.
 
Il est facheux que Monsieur le President le Bailleul
se soit trouué dans ce sentiment, luy qui passe
pour vn des plus judicieux, & des plus sensez de la
Robe : cela surprit mesme S. A. R. Qui fit ce Raisonnement
si digne d’vn Prince le plus capable en
matiere d’affaires d’Estat, & le plus zeléau bien public
qui fut jamais.
Messieurs, leur dit-il, personne ne doute de
vôtre fidelité au seruice du Roy, de vôtre integrité
à rendre la Iustice, & de vostre zele au bien public
pendant ces troubles : c’est pourquoy il seroit difficile
de vous rien reprocher qui pût vous condamner
d’aucune faute dans l’administration des affaires qui
vous sont mises entre les mains : toutesfois je m’étonne
qu’il se trouue encor quelques-vns dans vôtre
Compagnie qui balance le dessein qu’on doit prendre
sur l’affaire presente, puis-que chacun sçait bien
que ce n’est que pour le seruice du Roy : & par mon
ordre que Monsieur de Nemours est entré en ce
Royaume, que j’authorise tout ce qu’il fait, que ses
troupes viennent sous mon aueu, & ce qui est de
bien plus considerable en cecy ; c’est que ce n’est
qu’en suite d’vn Arrest que vous auez rendu, qui
approuue cette arriuée de gens de guerre, & qui
donne lieu à tout ce grand appareil, voulez vous déja