[retour à un affichage normal]

Accueil > recherche > Affichage d'une occurrence en contexte

Mazarinade n° A_4_19

Image de la page

Anonyme [1649], LA HARANGVE DES PROVINCIAVX FAITE A LA REINE POVR LE PROCHAIN retour du ROY en sa bonne ville de Paris. , françaisRéférence RIM : M0_1557. Cote locale : A_4_19.


craindre que Dieu ne la fist dessus vous, & si vous ne les
auez pas sceuës, comme trop ordinairement il arriue que les
grands ne peuuent pas tous voir : Nous vous apprenons de
quelle sorte on vous rend seruice, & de quelle sorte on obeït
à vos commandemens. Vous ne doutez pas, MADAME,
que de tels seruiteurs ne soyent de veritables traistres, &
que vous obeïr de cette sorte ne soit attenter à vostre gloire,
& à vostre authorité.
 
C’estoit vostre gloire, MADAME, de faire inuiolablement
obseruer la paix, que vous nous auez donnée. Entre
les hommes c’est vne des plus belles parties de l’homme,
que de tenir sa parole : on rompt tout commerce auec les
menteurs, & les infracteurs de leurs sermens ; & les personnes
Royalles sont d’autant plus obligez à les obseruer,
qu’elles n’en font point qui ne soient de plus grande consequence
que ceux du commun, & dont le violement ne soit
plus ruyneux, & plus preiudiciable. La Maiesté des Roys ne
doit pas mesme souffrir de simples mensonges, & qui dit parole
de Roy, doit dire quelque chose d’aussi inuiolable, comme
le doit estre la royauté. Au de là mesme de toutes ces choses,
la Loy de Dieu sacrée aux Roys comme aux suiets, nous
oblige à tenir inuiolablement nos sermens ; & Dieu vange
rigoureusement la Majesté de son nom qu’on mesprise
quand on les enfraint & qu’on les viole. C’estoit doncques
vostre gloire en toutes sortes (puis qu’il est glorieux d’obeïr
à Dieu) de ne pas contreuenir à vostre parole Viuans
soubs les doux effets de vostre clemence : c’estoit vostre
gloire puis que nous l’eussions sans cesse benie. Les villes
eussent repris leur commerce, la campagne eust veu fleurir
ces esperances auec le Prin-temps, les choses ce fussent
remises dans leur premier estat. Vos suiets ce fussent enrichis,
vostre Noblesse en fust deuenuë plus splendide : vostre
Cour en eust paru plus magnifique, vos thresors en
eussent esté plus grands, vos armées plus fortes, vos ennemis
plus abbatus : cét estat generallement plus florissant &
plus redouté, & la gloire de vostre Regence plus superbe