[retour à un affichage normal]

Accueil > recherche > Affichage d'une occurrence en contexte

Mazarinade n° C_5_40

Image de la page

Anonyme [1649], LA HARANGVE DES PROVINCIAVX FAITE A LA REINE POVR LE PROCHAIN retour du ROY en sa bonne ville de Paris. , françaisRéférence RIM : M0_1557. Cote locale : C_5_40.


& plus admirée. En cet Estat vous eussiez paru à toute la
terre, comme la meilleure, la plus sage, la plus heureuse, &
la plus grande Reyne de l’vniuers, & il n’y eust point eu de
Princes ny de peuples qui n’eussent tout ensemble admire &
craint vostre pouuoir.
 
Mais, MADAME, par la violence & la fureur de
vos infidelles seruiteurs, les choses vont bien d’vne autre
maniere. Vous nous auez donné la paix, & les cruels nous
ont porté par tout la guerre. Ils ont debordé comme des
torrens dans les Prouinces, & au lieu de la tranquilité & du
repos que l’on esperoit, vos pauures suiets n’ont veu, ny
n’ont éprouué autre chose que ruine & que desolation.
Que pouuoient croire, MADAME, ces pauures malheureux
tyrannisez auec tant d’iniustice, si ce n’est que vous
manquiez à vostre parole ? & les Estrangers qui en ont eu
des Relations fidelles, que pouuoient-ils en dire autre chose
dedans ce rencontre, grande Reyne ? Qu’elle iustice
ne vous deuez vous pas de ces perfides, qui ont mis en si
grand risque vostre gloire, & en si triste estat vostre Royaume.
Car enfin nous ne pouuons pas nous persuader que
tant d’inhumanitez ayent esté commises par vos ordres,
de quelque costé que nous les considerions, nous ny pouuons
voir rien de iuste, rien d’vtille, rien de delectable, qui
doncques vous y auroit obligée ? Il n’y a rien de iuste, car
quelle iustice à supplicier tant d’innocens ? & à liurer sans
crime tant de miserables à des genres de tourmens in ouys !
Quelle iustice à nous promettre la paix, & à nous faire la
guerre ? à cesser d’estre nostre Reyne pour estre nostre ennemie ?
& enfin quand nous serions les plus coupables de la
terre, à nous punir apres nous auoir pardonné ? Certes,
MADAME, Dieu qui est plus grand que vous n’en fait pas
de mesme, & tous criminels que nous sommes quand il nous
a pardonnez, il ne nous punit point. Aussi, MADAME,
ce seroit en vous vne imperfection bien grande, si vous
vous repentiez d’auoir voulu vser enuers nous de douceur,
& si vous n’auiez pas le pouuoir d’estre tousiours bonne.