[retour à un affichage normal]

Accueil > recherche > Affichage d'une occurrence en contexte

Mazarinade n° C_5_73

Image de la page

Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.


soupçon d’vne mort aduancée par poison : Mais encor il a
fait venir deux fois le Roy mineur au Parlement, pour par
sa presence l’obliger à les receuoir & aggréer ; & quoy qu’il
eust droit de s’opposer à ses venuës & enleuements, & d’empescher
l’effect de tels Edicts & Declarations : neantmoins
la consideration de la Guerre a encor empesché qu’il ne se
soit opposé à des entreprises si preiudiciables à l’honneur du
Roy, à la liberté des Cours Souueraines & bien de tout le
Royaume, dans l’esperance d’vne prochaine Paix, laquelle
restabliroit l’ordre dans l’Estat, & soulageroit la misere du
peuple, de laquelle le Cardinal Mazarin a tousiours entretenu
le Parlement & toute la France ; Mais voyant que le
mal s’augmentoit, qu’il entretenoit la Guerre par ses intrigues
au lieu d’auancer la Paix ; Que les deniers qu’on leuoit
sur le peuple n’estoient point employez au fait de la Guerre,
mais tournoient à sa seule vtilité, par le moyen de ses Comptans ;
Que le peuple ne pouuoit plus supporter les grandes
charges des Tailles & Impositions, desquelles il estoit opprimé ;
Qu’il vouloit despoüiller tous les Officiers de France,
mesmes ceux des Cours Souueraines de leurs biens en leur
ostans leurs gages ; Qu’on refusoit mesmes de leur en donner
quelque portion pour leurs aliments ; Que les Tailles
estoient tombées en party contre l’ordre prescript par les
Ordonnances & les Loix du Royaume ; Que par ce moyen
elles se leuoient auec des rigueurs insupportables & des frais
excessifs ; Que les Traittans auoient auancez deux années
& plus du reuenu du Roy, desquelles auances il auoit absorbé
la plus grande partie ; Qu’il choquoit continuellemẽt
l’authorité, liberté & priuilege du Parlement par des Arrests
du Conseil & autres nommez du Conseil d’enhaut, desquels
il se seruoit pour l’oppression du peuple ; Que les Baux des
Fermes du Roy & les Traittez des parties qui se faisoient au
Conseil n’alloient pas à leur iuste prix & valeur, à cause des
grandes sommes de deniers qu’il tiroit des Fermiers & gens
d’affaires lors de l’adiudication desdits Baux & Traittez, à la
charge desquels ils s’adiugeoient, & du tribut Annuel qu’il
tiroit d’eux pour la faueur de sa protection, & que par ce
moyen par des voyes illicites, il faisoit de grands fonds de
deniers au preiudice des Finances du Roy & de la chose publique ;