[retour à un affichage normal]

Accueil > recherche > Affichage d'une occurrence en contexte

Mazarinade n° C_5_73

Image de la page

Anonyme [1649], LA IVSTIFICATION DV PARLEMENT ET DE LA VILLE DE PARIS DANS LA PRISE DES ARMES ; CONTRE L’OPPRESSION & Tyrannie du Cardinal Mazarin. , françaisRéférence RIM : M0_1796. Cote locale : C_5_73.


par vne charge insupportable de leuées & imposts sur le
peuple, sous leur nom, leur domination douce & agreable
en tirannie : car quoy qu’ils ayent eu quelquefois dessein
d’apporter quelque violence à la liberté des suffrages du Parlement
& chãger cette forme establie par les loix du Royaume,
& que mesmes pour y paruenir ils ayent faict mander le
Parlement par nos Roys pour luy dire de bouche leurs intẽtions,
& qu’ils ayent cherché des moyens extraordinaires
pour faire reüssir de nouuelles leuées, neantmoins, ils n’ont
pû donner aucune atteinte à leurs sentimens, ny renuerser
vn establissement si iuste & raisonnable. Le Parlement a esté
pareillement en possession de representer aux Roys les iustes
plaintes de tous les Estats & Corps du Royaume par des
humbles Remonstrances, ausquels ils ont tousiours fait raison.
Il est encores à obseruer que le Parlement n’est point
obligé de deferer & n’a iamais deferé ny eu d’esgard aux Arrests
du Conseil & Lettres de Cachet portant quelques Ordonnances
importantes à l’Estat : comme estant cette procedure
contraire aux Loix fondamentales du Royaume, à
l’ordre ancien de France & aux Ordonnances. Et auparauant
le regne du deffunct Roy les peuples n’ont iamais souffert
aucunes leuées de deniers establis par Arrest du Conseil :
Mais au commencement de son regne & pendant sa minorité,
le feu Marquis d’Ancre, duquel la memoire a esté condamnée
par le Parlement, & doit estre en abomination à
toute la France : Cet Italien qui n’auoit aucuns biens de naissance,
bruslant d’vne conuoitise Italienne, n’a pas seulement
sous le credit & faueur de la deffuncte Reyne Marie de Medicis
Mere du deffunct Roy & Regente en France, espuisé
vne bonne partie des Finances que le bon mesnage d’Henry
quatriesme auoit amassé dans le Chasteau de la Bastille, fait
augmenter les leuées ordinaires de deniers, en establir de
nouuelles par des voyes extraordinaires qu’il a appliquées à
son profit par des Comptans : Mais encores sçachant que le
Parlement, pour son deuoir, vouloit prendre connoissance
des desordres qui s’estoient formez dans l’Estat par sa mauuaise
conduite. Il a osé entreprendre sur sa liberté & franchise
en titant les plus affectionnez de leurs Corps au bien
public de l’exercice ordinaire de leurs charges.