[retour à un affichage normal]

Mazarinade n° A_6_53

Image de la page

Anonyme [1649], LA PAIX EN SON THROSNE DE GLOIRE, OV LA CORNE D’ABONDANCE apportée du Ciel à tous les bons François, par l’Ange Tutelaire de ce Royaume. , françaisRéférence RIM : M0_2649. Cote locale : A_6_53.

& tous les plus raisonnables de l’Vniuers ne la confiderent
maintenant que comme vne image mysterieuse de l’Estat Angelique.
 
Se peut il voir quelque chose dans le monde, qui puisse
mieux appuyer la dignité du Souuerain, ny qui puisse mieux
eterniser sa memoire ? Qu’est ce qui le peut faire plus amoureusement
cherir de ses Subjets ? Et qu’est ce qui sçauroit mieux
entretenir les Princes & les Peuples dans vne vnion plus parfaite ?
Iugez-vous apres cela qu’vn Monarque se puisse rendre plus
chery & plus asseuré par ses cruautez, que par les puissantes inclinations
qu’il doit auoir à bien faire ? La Paix n’est pas moins
necessaire à celuy qui commande dans vn Estat, qu’à ceux qui
doiuent viure sous ses loix, & sous sa conduite ? La Paix est l’ame
vegetatiue de l’interest public, & le port de Salut de tout ce que
la Nature sçauroit produire ? C’est par elle que les champs abondent
en fruicts, & que les villes sont munies de toutes sorte de
viures. C’est par elle que les Loix sont en vigueur, & que les
Republiques sont florissantes. C’est par elle que Dieu se trouue
pieusement reueré, & que la Iustice est religieusement obseruée.
C’est par elle que tous les Pauures sont soulagez, & que les
riches prosperent. C’est par elle que la ieunesse apprend la Vertu,
& que les vieillards sont en estime. Et c’est par elle que les animaux
priuez de raison trouuẽt vn refuge asseuré parmy les hommes ;
que les Elemens subsistent dans vn mutuel accord, & que
tout le monde se tient vniuersellemẽt dãs vne parfaite harmonie.
Et quoy que les vns soient naturellement pourueus d’armes offensiues,
& que les autres soient doüez de plusieurs qualitez contraires,
ils ne laissent pas de s’vnir en Paix, & d’obeïr aux Decrets
de sa Prouidence infinie. Gedeon fit construire vn Autel
qu’il appelloit la Paix du Seigneur, & Iesus Christ touché de
pitié fût contraint de verser des larmes sur la ville de Ierusalem,
lors qu’elle ne voulut pas dessiller les yeux en faueur de la Paix,
que ce diuin Seigneur vouloit donner à son peuple. Ne nous a
t’il pas donné des bras pour nous acoler en signe de Paix, & le
sentiment du baiser pour se tesmoigner de l’amitié les vns aux
autres ? La Raison est vne faculté de l’ame qui nous doit obliger
plustost à suiure les graces de la Paix, que les malheurs du desordre.
La Morale est vne science inuentée pour moderer les salies
de l’esprit & pour porter nostre entendement à la Paix interieure
de l’ame. Et quoi que les passions des hõmes soient d’vne nature à