[retour à un affichage normal]

Accueil > recherche > Affichage d'une occurrence en contexte

Mazarinade n° C_11_16

Image de la page

Anonyme [1651], LA PROSPERITÉ MAL-HEVREVSE OV LE PARFAIT ABREGÉ DE L’HISTOIRE DV CARDINAL MAZARIN, OV SE VOID TOVTES LES RVSES ET toutes les Fourberies dont il s’est seruy pour arriuer au feste de la progieuse fortune où il s’est veu. AVEC VNE RELATION DE TOVTES les causes de sa disgrace. , françaisRéférence RIM : M0_2925. Cote locale : C_11_16.


Pape fut comme contraint de lui accorder ce
qu’il n’auoit aucunement enuie de faire pour
vn homme qu’il sçauoit bien n’estre que trop
dangereux à toute l’Europe. Et pour n’encourre
pas la disgrace du Roy d’Espagne, à qui il
auoit refusé la mesme chose pour Contalto, il
luy accorda pareillement aussi le Chapeau de
cardinal, & en exclud par ce moyen là le sieur
Visconty à qui il auoit intention de le donner,
en faueur de la Couronne de Polongne.
 
Ces honneurs, quoy que plus grands qu’il ne
pouuoit iamais esperer, ne furent rien en comparaison
de celles qui luy furent faites en suitte.
Quelque temps apres le Cardinal de Richelieu,
comme la seule intelligence qui mouuoit
tout les affaires de France & qui les auoit portees
au plus haut point où elles pouuoient estre
mises, mourut au grand regret de tous ceux
qui auoient le don de lire dans les choses futures.
Ce qui obligea le Roy, croyant que ce
Mazarin fut vn second Armand, enuoyé du
Ciel pour s’en seruir comme du premier, à luy
donner la conduite de tous les affaires de son
Royaume. S’imaginant aussi qu’il n’y auoit que
luy seul au monde capable de les bien entendre
& de les bien gouuerner, selon l’impressiõ
que le Cardinal de Richelieu luy en auoit donné.
A mesme instant le Roy le fait son Conseiller