[retour à un affichage normal]

Mazarinade n° C_11_16

Image de la page

Anonyme [1651], LA PROSPERITÉ MAL-HEVREVSE OV LE PARFAIT ABREGÉ DE L’HISTOIRE DV CARDINAL MAZARIN, OV SE VOID TOVTES LES RVSES ET toutes les Fourberies dont il s’est seruy pour arriuer au feste de la progieuse fortune où il s’est veu. AVEC VNE RELATION DE TOVTES les causes de sa disgrace. , françaisRéférence RIM : M0_2925. Cote locale : C_11_16.

pour les faire reuenir en leur premiere
forme : C’est ce qui fait qu’il ne faut pas mesurer
la statuë auec la colomne qui la soutient,
ny iuger de l’homme par sa dignité ny par sa
fortune. Ces sangsuës publiques se detruisent
aussi tost par des foibles instrumens, que par
des puissances redoutables : & quand le iuste
courroux de Dieu les veut punir, sa Diuine
Majesté ny employe pas tousiours les espouuentables
efforts de ses carreaux, ny les horribles
grondans de son tonerre, ainsi que nous
pouuons voir en la personne de Iule Mazarin,
qui s’estant esleué au feste des plus prodigieuses
grandeurs, par des ruses & par des fourberies
qui n’en eurent iamais de pareilles,
tranchoit desia du Souuerain, & vouloit assujettir
les Princes du sang à receuoir les loix
de son insigne tyrannie : mais à la fin son pernicieux
attentat, comme vn principe tres funeste
à tous ses desseins, a donné l’estre à
sa cheute, & à sa miserable deffaite. Ce monstre
est fils de Pierre Mazarin, marchand &
natif de Sicile, lequel apres auoir negocié
quelque temps en son pays, soit qu’il se fut
ruiné ou par mal-heur, ou par sa mauuaise
conduite fut contraint de faire banqueroute
à ses creanciers, & pour la seureté du reste de
son bien il prit la fuite, & s’en alla refugier à