[retour à un affichage normal]

Accueil > recherche > Affichage d'une occurrence en contexte

Mazarinade n° C_9_62

Image de la page

Anonyme [1649], LA RENOMMEE DE MONSIEVR LE MARESCHAL DE TVRENNE. , françaisRéférence RIM : M0_3350. Cote locale : C_9_62.


esmeuë du vent ; toutesfois comme la necessité éueille
l’industrie, & que l’homme plus que tous les animaux
est extremement inuentif quand il y va de son salut,
sa crainte luy donne de l’artifice, & luy fait penser aux
moyens de parer aux coups qu’il voit venir. Dans ce
dessein, comme il voit bien qu’il n’a point assez de forces
pour opposer à celles de Monsieur de Turenne, &
qu’il est perdu s’il les peut attendre, il s’auise de les
arrester & preuenir de loing. L’authorité Royalle, de
laquelle il se sert à toutes rencontres, & qu’il employe
indiscretement à tous vsages, luy sert en cette occasion.
Il se plaint doncques au Conseil de Sainct Germain
de la venuë de Monsieur de Turenne ; Represente
qu’abandonner l’Allemagne sans les ordres du
Roy, c’estoit le trahir, Qu’il ne pouuoit auoir vn bon
dessein dans vne entreprise si temeraire, Que s’il ne
vient pas pour le secourir, il est criminel, Que quand
mesmes leur seruice seroit le but de sa marche, son zele
est indiscret, ou plustost son audace est insupportable,
& le mespris qu’il fait de leurs Majestez trop visible
pour souffrir quelque excuse. Que ce n’est point
aux sujets à iuger de leur vtilité, ny à s’esmanciper de
rendre quelques seruices dont ils n’ont point receu les
ordres. Que si cette liberté leur estoit permise, la puissance
du Roy seroit tout à fait aneantie, & desormais
qu’elle despendroit du caprice du moindre General
d’armée, qui conduisans les forces où il luy plairoit,
en seroit quitte pour asseurer qu’il auoit l’intention
bonne, & mesmes demanderoit recompense de ce qui