[retour à un affichage normal]

Accueil > recherche > Affichage d'une occurrence en contexte

Mazarinade n° C_8_58

Image de la page

Anonyme [1649], LA RESIPISCENCE DV CARDINAL MAZARIN. , françaisRéférence RIM : M0_3507. Cote locale : C_8_58.



Ie me vois auiourd’huy balancer dans la crainte
Attaqué d’vne attainte,
Qui me fait mespriser le desir tres-ardent
Que i’ay d’estre content ;
Bannissant loing de moy la source de tout crime
(Dont mon cœur est victime)
Qui ne me permet pas dans ma captiuité
De viure en liberté,
Il s’est fait si puissant, que gouuernant mon ame
Il modere sa flame,
Luy refusant à tort & tres-iniustement,
Le seul contentement
Qu’elle veut receuoir dedans sa repentance,
En faisant penitence.
Du mal qu’elle a commis par trop d’ambition
Suiuant sa passion,
Si j’eusse esté prudent, cõme il faut l’estre en France
Toute la medisance
N’auroit rien profité, & ceux qui raschent fort
De procurer ma mort
Me cheriroient beaucoup, l’authorité supresme
Dependroit de moy mesme
Mais rien plus iustement qu’elle n’en dépend pas.
Si iamais le trespas
Fut venu quelque iour pour frapper à ma porte,
Il eust bien fait en sorte,
Qu’il n’auroit pas choqué ma grande authorité,
Que dedans l’equité.
On est bien plus heureux d’euiter la discorde
Et de viure en concorde.