[retour à un affichage normal]

Mazarinade n° B_5_24

Image de la page

Anonyme [1649], LA RESSEMBLANCE DE MADAME LA DVCHESSE D’ORLEANS A LA COLOMBE QVI APPORTA LE RAMEAV d’Oliue à Noé. Presenté à son Altesse Royale. , françaisRéférence RIM : M0_3516. Cote locale : B_5_24.

LA RESSEMBLANCE DE MADAME
la Duchesse d’Orleans à la Colombe, qui
apporta le Rameau d’Oliue à Noé.
Presenté à son Altesse Royale.
MADAME,
La Colombe qui apporta le Rameau d’Oliue au restaurateur
du genre humain, nous a laissé vn veritable symbole
des glorieuses qualitez que vostre Altesse Royale possede
si auantageusement, Dieu l’enuoya à Noé, pour luy montrer
que sa iuste colere estoit appaisée, & vous, MADAME,
vous auez toute vostre vie employé vos soings, vos sollicitations
& vos prieres à appaiser la colere du Createur, &
moderer celle des creatures. La Colombe estoit vn merueilleux
symbole de blancheur, & vous outre la blancheur
incomparable, & les beautez rauissantes de vostre belle
face, vous auez vne ame toute blanche, toute pure, & toute
exempte de tache, elle estoit le symbole de la douceur, &
vous vous estes la douceur mesme ; elle estoit le symbole
de l’amour, & vous vous ne viuez que de l’amour de Dieu,
& vous ne respirez autre chose ; elle estoit le symbole de
l’innocence, & toute vostre vie en est vn fidelle miroir ; elle
estoit le symbole de la Chasteté, & vous vous en estes le
prototype ; elle estoit le symbole de la pietè, & vous vous
en estes vn entier exemple ; elle apportoit le rameau d’Oliue
pour obliger à se réjoüir de la paix puisque l’Oliue en est
le symbole, & vous vous n’auez d’autre pensée que celle de
procurer la Paix à toute l’Europe ; elle apportoit la nouuelle
de la retraicte des eaux, & vous par vos pieuses &
douces sollicitations vous auez causé la retraicte des gens
de guerre qui auoient inuesty nostre Ville & nos murailles ;