[retour à un affichage normal]

Accueil > recherche > Affichage d'une occurrence en contexte

Mazarinade n° B_15_34

Image de la page

Duval, Jean [?] [1652], LE PARLEMENT BVRLESQVE DE PONTHOISE, CONTENANT LES NOMS de tous les Presidens & Conseillers Renegats qui composent ledit Parlement. Ensemble les Harangues burlesques faites par le pretendu premier President. , françaisRéférence RIM : M0_2701. Cote locale : B_15_34.



 
Mais qu’on ne blasme de ce choix
Le petit Molé Sainte Croix
Il ne peut pas (ce petit here)
Estre moins meschant que son pere.
 
 
Ce que ie treuue plus honteux,
C’est que ce Senat est boiteux,
Et qu’vne si noble assemblée
D’vn petit pied bot est meublée,
C’est l’Abbé Feideau de Bernay,
Qu’on prẽdroit pour vn enfant mort né
Il est dans cette rapsodie
Le Vulcan de la Comedie,
Ce petit Conseiller tout neuf
Ayme autant la piece de beuf
Que son oncle de Villenoce,
Qui depuis peu gist dans la fosse.
L’amy ce sont là les Docteurs
Qui sont de cette farce Acteurs.
 
 
Ce n’est pas tout ce batellage
Attire dans son badinage,
Et fait, comme ceux-là coyon
Monsieur l’Euesque de Noyon,
Ce n’est pas pourtant sans prudence,
Car quand à l’ombre de potence,
Ces traistres on fera danser,
Il sera pour les confesser,
Et se seruir de toute escrime
Pour les absoudre de leur crime.
L’HOSPITAL ce double renard
En est quoy que jadis cornard.
 
 
VILLEROY dedans la cohuë
Prend sa place & cela me tuë
Car estant du Roy Gouuerneur
A sa charge il fait deshonneur.
CHARMPLATREVX l’infame adultere
Sot Pédant de son barbu pere
Qui ne vaut pas tant qu’vn grand blanc
Parmy ces Farceurs tient son rang.
I’y vy quatre meschantes bestes
Qu’on nomme Maistres des Requestes
Les voicy, l’Huillier d’Orgeual
Presque autant qu’vn asne brutal,
Gendre d’Aubry Robert le Diable
Et d’vn humeur insupportable.
BORDEAVX race de Partisan
De malices grand artisan.
BALTAZARD dont la fade mine
Semble estre de quelque poupine.
 
 
Mais qui l’emporte dessus tous,
C’est Berchere dont le poil roux
Pourroit bien à la rouge beste
Donner quelque martel in teste
Car depuis le Tarif nouueau
Il craint la sueur d’vn rousseau,
Ce Bourguignon a la verolle,
Et ne baue que de la colle,
Preneur de droits litigieux,
Escroc, & si contagieux,
Qu’il faudra qu’enfin l’on assomme
Vn si vilain & puant homme.
Voila mon bon amy comment
Est composé ce Parlement,
Leur Greffier Radigue s’appelle
Qui n’est qu’vne vieille haridelle
Pourtant il s’est fait arrester,
Pour leurs beaux Arrests fagotter.
 
 
Quand ces gallands furent ensemble,
Dont aucuns, ainsi qu’il me semble,
Pour soutanne auoient des manteaux
Attachez comme deuanteaux,
MOLE son oraison commence
Auecque comique eloquence,
Et leur dit à peu prés ces mots
Messieurs, nous ne sommes tant sots,
Et si nous rendons des oracles
Nous faisons aussi des miracles
Certes ie n’en seray dedit,
Par saint Iean, qui l’eust iamais dit,
Que dessus les riues de l’Oise,
On eust mis Paris dans Ponthoise,
Mon fils Champlastreux est sçauant
Que Vil-iuifue on y met souuent
Mais Paris ! c’est vne merueille
Qui n’aura iamais sa pareille.
Qüy da ! Paris icy sera
Quand tout le Palais y viendra,
Aduocats, Procureurs, Libraires
Greffiers, Huissiers, Clercs & Lingeres