[retour à un affichage normal]

Accueil > recherche > Affichage d'une occurrence en contexte

Mazarinade n° C_6_33

Image de la page

G. D. B. [signé] [1649], LA NAISSANCE D’VN MONSTRE ESPOVVENTABLE. Engendré d’vne belle & ieune femme, natifue de Mark, à deux lieuës de Calais, le vingt-troisiesme Feurier 1649. , françaisRéférence RIM : M0_2524. Cote locale : C_6_33.


& par des cris espouuantables, rendoit bien tesmoignage
que son corps souffroit grands douleurs. Elle fut dans
ce tourment iusqu’au 23. Feurier à midy : & auec l’ayde de
Seruais Cardon, Chirurgien, qui luy fit incision, elle se
desliura d’vn enfant. Que dis-je d’vn enfant ? ce fust plutost
d’vn Monstre espouuantable, n’ayant rien d’humain
que la face qui est assez passablement belle, horsmis qu’il
à la bouche extremement grande ; les oreilles comme
celles d’vn chat accompagnees de deux cornes qui se croqueuille
par derriere ; les mains semblables aux pattes
d’vn Singe, dans l’vne desquelles il tenoit vn parchemin
oû ces mots estoient escrits ; Ie distruiray celuy qui m’a engendré.
Et en l’autre main il auoit vn ferrement, comme
pouuoit estre vn petit fer de ses flesches que l’on soufle
auec des serbacannes, lequel fer on ne luy sceut tirer
des mains, pour quelque effort que l’on luy pust faire ;
derriere le dos, il est garny de quatre petites aisles, semblables
à celle d’vne Chauue-souris, en l’vne desquelles
on y peut voir depeinte vne petite chaisne composée de
sept agneaux, & à vne autre de l’autre costé il y à comme
vn petit animal, qui a vne corne à la teste ; l’vn des pieds
de ce Monstre est semblable à celuy d’vn Chevreüil, hors
qu’il est plus velu sans comparaison ; & l’autre resemble
au pied d’vne poulle n’y ayant que trois doigts qui font
face d’vn costé, & vn argot qui regarde de l’autre, tous
armez d’ongles pointus à merueilles : Toute la peau de son
corps est fort dure & bazannée horsmis entre les deux
tetins, qu’elle est fort tendre, & de couleur entre verd &
jaulne ; vn petit au dessus du nombril il y a vne estoille qui
est rouge comme sang, & au milieu du dos, entre ces quatres