[retour à un affichage normal]

Mazarinade n° B_8_49

Image de la page

Lorraine, Charles de [signé] [1652], DERNIERE LETTRE DE MONSIEVR LE DVC DE LORRAINE, A MONSIEVR LE PRINCE : APPORTÉE PAR VN COLONNEL DE SON ARMÉE : Le 25. May 1652. En laquelle il declare plainement toutes ses intentions, les suiets de son Retardement, & sa marche à grandes iournées vers Paris. , françaisRéférence RIM : M0_1022. Cote locale : B_8_49.

impatience, & le demande par des vœux & des souhaits
inexplicables.
 
Ie vois bien, Monsieur, la part que vous prenez dans vne
si belle expedition, pour laquelle vous exposez si librement
vostre sang & vostre vie, à laquelle vous donnez tous les
trauaux & vos fatigues, & en faueur de laquelle vous sacrifiez
vostre propre interest à celuy du public qui vous doit
estre toujours obligé du bon-heur qui luy en arriuera.
Pour moy ie m’estimeray tres-heureux d’y contribuer ce qui
me reste de forces apres le débris d’vne souueraineté, que le
Roy ne refusera peut-estre point de rendre à mes seruices,
que ie luy continuëray toute ma vie, aussi bien que l’hõmage
que ie luy en veux deuoir, auquel ie ne pense point auoir iamais
manqué Ie n’ignore pas que ses Ministres luy donnent
d’autres sentimẽts de ma fidelité : mais le temps pouruoyra
à mon innocence contre leurs calomnies, & ie croiray toujours
auoir assez fait si ie m’en iustifie aupres de S. A. R. &
vous en donne des preuues par mon procedé en l’occasion
presente. Le Sr N. Colonel en mon armée, & Porteur de
celle-cy, vous dira plus precisemẽt les sentimẽts dãs lesquels
ie suis, & vous pouuez luy donner toute creance, estant vn
gentil-homme d’honneur, capable de toutes ces choses,
& auquel ie me confie plus qu’à personne du Monde. Ie
luy ay donné ordre & plein pouuoir d’agir en mon nom
en tout ce que vous iugerez qu’il sera necessaire.
Cependant ie feray auancer mes Troupes à grandes
iournées, & n’oublieray rien de tout ce qui se pourra
faire pour leur jonction auec les vostres. Ie suis,
MONSIEVR,
Vostre tres-humble & tres-affectionné
seruiteur,
CHARLES DE LORRAINE.
A la Ferté Milon,
ce 22. May 1652.