[retour à un affichage normal]

Accueil > recherche > Affichage d'une occurrence en contexte

Mazarinade n° B_6_10

Image de la page

Anonyme [1652], LA VERITABLE RESPONCE AV PRETENDV MANIFESTE DE MONSIEVR LE PRINCE. , françaisRéférence RIM : M0_3953. Cote locale : B_6_10.


RESPONCE AV PRETENDV MANIFESTE
de Monsieur le Prince.

DANS vne affaire de si grande importance,
il n’est pas necessaire d’vn grand
preambule, ie ne croy pas que Monsieur
le Prince aye fait ny mesme veu
ce Manifeste, il ne l’auroit pas souffert,
estant trop foible dans ses raisons, trop
insolent dans ses paroles, trop injurieux contre son
Roy, & trop plein de faussetez contre des veritez qui
sont trop publiques. Et d’autant que l’Autheur diuise
son discours par des interualles qui recommencent à la
ligne, ie respondray à chaque interualle qui semble
estre tousiours quelque verité qu’il propose, & qu’il
veut establir, il y en a douze. Donc dans la premiere
il semble que Monsieur le Prince veut persuader que
Paris est fort attaché à ses interests, & que sa ruyne
& la perte de la Ville ne vont estre desormais qu’vne
mesme chose ; & que l’effect de la bonne resolution
que l’on prend de rendre vne entiere obeyssance au
Roy, est tout à fait à son prejudice, & à celuy de la
Ville ; Mais ny l’vn ny l’autre n’est veritable ; car Paris
n’a point d’engagement auec Monsieur le Prince, &
s’il croit que la soubmission de Paris au Roy est la ruyne
de ses desseins, il doit croire aussi que c’est la conseruation
de la Ville.
En la seconde, il censure le Roy & son Conseil, d’apporter
trop de longueur aux affaires & point de sincerité.
Mais il cache la verité, & ne dit pas que la Cour
quand on luy a demandé des seuretez de toutes les
promesses qu’il faisoit, qu’il n’en a point voulu ny peu