[retour à un affichage normal]

Accueil > recherche > Affichage d'une occurrence en contexte

Mazarinade n° B_6_10

Image de la page

Anonyme [1652], LA VERITABLE RESPONCE AV PRETENDV MANIFESTE DE MONSIEVR LE PRINCE. , françaisRéférence RIM : M0_3953. Cote locale : B_6_10.


dans le Parlement où on luy applaudissoit, parce qu’il
n’y auoit plus de liberté de luy contredire, ou parce
que l’on s’estoit desia engagé trop auant sans penser à
ce que l’on alloit faire, ainsi tant d’escrits composez par
ses memoires, imprimés par ses ordres, affichez par ses
affidez, debitez par ses mains, & ces voix achetez, passent
pour vn silence perpetuel, puis qu’il dit qu’il n’a
iamais parlé que par action. Mais qu’elles actions puis
que l’on ne luy a iamais veu rien faire qui ait esté au
bien particulier ou public de la ville. Tous les particuliers
ont esté ruinez par la perte des Villages prochains,
& le public calomnié & accusé de tout le
Royaume & des Estrangers, pour l’auoir souffert continuër
ses desseins contre le Roy.
 
Là il fait recit & estalle la iournée de la porte Sainct
Antoine : mais il faut qu’il aduouë :
1. Que si on ne luy eust point ouuert la porte, ny à
son bagage, il eust esté tout pris & ses trouppes deffaites
entierement.
2. Que personne ne l’auoit prié ou engagé d’y aller :
Que Paris n’auoit que faire de cette boutade, qu’il ne
craignoit rien de son Roy, bien loin d’apprehender des
Vespres Siciliennes, & des iournées de Saint Barthelemy,
comme il dit.
3. Si l’on eust receu le Roy dés ce iour là la Ville,
ses habitans, & les pauures villages n’auroient iamais
tant souffert qu’ils ont fait, & le Roy mesme dans sa Iustice
& dans sa cholere n’auroit pas ruiné tant de peuples
comme le Prince a fait, & laissé faire par ces gens.
4. Il appelle la iournée de la Porte S. Antoine la
plus dangereuse de toutes ses iournées il a raison, car
quand il a combatu autrefois contre les Ennemis du
Royaume, ces combats estans iustes, & auec l’obeïssance
& soumission qu’il rendoit aux ordres du Roy : Et
celuy-cy estoit contre ses volontez & contre sa personne
Sacrée qui paroissoit en sa presence : & par consequent
tres-dangereuse pour Monsieur le Prince, que
le Ciel ne vint à punir sa reuolte.